საქართველოს განათლებისა და მეცნიერების მინისტრის, ალექსანდრე ჯეჯელავას ინფორმაციით, არდადეგებზე, ზამთრის კურორტებზე 10 ათასამდე ბავშვმა დაისვენა. ამის შესახებ ჯეჯელავამ საქართველოს მთავრობის სხდომის დაწყებამდე განაცხადა.

"განსაკუთრებით სასიხარულო ის არის ჩემთვის, რომ დაახლოებით 300-მდე ბავშვი მცირე სკოლებიდან სახელმწიფო დაფინანსებით, ისეთ ხალხი, რომელიც შეიძლება ვერც ხვდება ზამთრის კურორტებზე თავისით, და მოკლედ დიდი მადლობა, დიდი გეგმები გვაქვს," - აღნიშნა ჯეჯელავამ. მან პროექტის განხორციელებაში დახმარებისთვის სპორტისა და ახალგაზრდობის სამინისტროს, ეკონომიკის სამინისტროსა და მთის კურორტების კომპანიას მადლობა გადაუხადა.

მთავრობის სხდომის დაწყებამდე ამ საკითხზე ისაუბრა საქართველოს პრემიერ-მინისტრმა, გიორგი კვირიკაშვილმაც. მისი თქმით, მომავალ წელს, შესაძლოა, მასშტაბი უფრო გაიზარდოს. პრემიერ-მინისტრი ამბობს, რომ მთის კურორტები ყველა შემოსავლის მქონე ადამიანისთვის ხელმისაწვდომი გახდეს.

"როგორც მოგეხსენებათ, ეს საკმაოდ ძვირადღირებული სიამოვნებაა, მაგრამ რაც უფრო მასიურს გავხდით ჩვენ მას, მით უფრო გავაიაფებთ და სახელმწიფოს მხრიდანაც ამაზე რესურსის დახარჯვა ღირს," - თქვა კვირიკაშვილმა.