ჯანდაცვის მინისტრის, ეკატერინე ტიკარაძის განცხადებით, მიმდინარე კვირაში იმსჯელებენ, რომ განისაზღვროს ჯგუფი, ვინც მესამე დოზით აიცრება. მისივე თქმით, ბუსტერის მასობრივად გამოყენებაზე, ჯერ მსჯელობა არ მიმდინარეობს.

"ამ ეტაპისთვის კლინიკურ და ვაქცინაციის საბჭოს ამ თემასთან დაკავშირებით კონკრეტული გადაწყვეტილებები მიღებული არ არის, ჯანმრთელობის მსოფლიო ორგანიზაციის რეკომენდაციებს დაველოდებით და შედეგად, მივიღებთ გადაწყვეტილებებს. მესამე დოზებთან დაკავშირებით რაც შეეხება, მსოფლიოს მასშტაბით აქ მიღებულია გადაწყვეტილება გარკვეულ ჯგუფზე, რომ პროტოკოლში გაიწეროს, ვისაც მესამე დოზა ექნება განსაზღვრული. ჩვენ ამ კვირაში ვიმსჯელებთ ამასთან დაკავშირებით, რომ საქართველოს პროტოკოლშიც შევიტანოთ ეს ცვლილება", — თქვა მან.

18 აგვისტოს დაავადებათა კონტროლის ეროვნული ცენტრის დირექტორა, ამირან გამყრელიძემ განაცხადა, რომ ვაქცინის მე-3 დოზაზე საუბარი საქართველოში მაშინ იქნება მიზანშეწონილი, როცა ქვეყნის მოსახლეობის დიდი ნაწილი ორჯერადად აიცრება. მისი თქმით, საერთაშორისო პრაქტიკისა და გამოცდილების შესაბამისად, საქართველოც მიიღებს ვაქცინის ბუსტერთან დაკავშირებით გადაწყვეტილებას, სავარაუდოდ, გვიან შემოდგომაზე.