დაავადებათა კონტროლის ცენტრის ხელმძღვანელის თქმით, საველე ჰოსპიტლების ამოქმედება იმიტომ გახდა აუცილებელი, რომ ძალიან რთული მდგომარეობა გვაქვს. ამის შესახებ ამირან გამყრელიძემ ჟურნალისტებისთვის გამართულ ვებინარზე დასმული კითხვის პასუხად განაცხადა.

"იმიტომ გახდა აუცილებლობა, რომ გვაქვს ძალიან რთული მდგომარეობა. დღეს ქვეყანაში გვყავს, თითქმის, 59 ათასი აქტიური პაციენტი. შემოდგომის პიკზე მაქსიმუმი გვყავდა 33 ათასი. აქტიური ნიშნავს ინფიცირებულ პაციენტებს, რომლებიც მკურნალობენ სახლში და ჰოსპიტლებში. დღეის მონაცემებით, 7 238 ადამიანი მკურნალობს ჰოსპიტლებში. საქართველოს ჰოსპიტალური სექტორის რესურსი, კოვიდისთვის რაც შეიძლება, იქნას გამოყენებული, დაახლოებით, 8 ათასამდეა. ამიტომაც მომზადდა საველე ჰოსპიტლები, ძირითადად თბილისში, იმიტომ, რომ ყველაზე დიდი დატვირთვა მოდის თბილისზე. დღეს, როგორც მე მაქვს ინფორმაცია, პირველი პაციენტები მიიღო დიღმის საველე ჰოპიტალმა. საველე ჰოსპიტლის აუცილებლობა გამოწვია ძალიან დიდმა დაწოლამ ჯანდაცვის სექტორზე", — ამბობს გამყრელიძე.

თბილისში სავალე ჰოსპიტლების გახსნა რამდენიმე დღის წინ დაიწყო. ამ დროისთვის გახსნილია ორი. დიღმის საველე ჰოსპიტალმა პაციენტების მიღება 19 აგვისტოს დაიწყო. 20 ივნისის მონაცემებით, აქ ჯერჯერობით 9 პაციენტია.