შოტლანდიის პირველ მინისტრს დამოუკიდებლობის შესახებ მეორე რეფერენდუმის ჩატარება სურს. BBC-ის ცნობით, ნიკოლა სტერჯენი შესაბამისი თხოვნით შოტლანდიის პარლამენტს მომდევნო კვირაში მიმართავს.

სტერჯენის განცხადებით, მას რეფერენდუმის ჩატარება 2018 წლის შემოდგომის და 2019 წლის გაზაფხულს შორის პერიოდში სურს. მისივე თქმით, შოტლანდიის მოქალაქეებს უნდა მიეცეთ არჩევანის საშუალება "რთულ ბრექსიტსა" და დამოუკიდებლობის მიღებას შორის.

დიდი ბრიტანეთისა და ჩრ. ირლანდიის გაერთიანებული სამეფოს პრემიერ-მინისტრი ტერეზა მეი თავს არიდებს კითხვას, მისცემს თუ არა შოტლანდიას რეფერენდუმის ჩატარების ნებართვას.

შოტლანდიის პარლამენტმა გამოაქვეყნა რამდენიმე ინიციატივა, რომლებიც შოტლანდიას საშუალებას მისცემს დარჩეს ევროპის გაერთიანებული ბაზრის ნაწილი, მიუხედავად იმისა, რომ დანარჩენი გაერთიანებული სამეფო ევროკავშირს დატოვებს. ამასთან ნიკოლა სტერჯენი ამბობს, რომ ბრექსიტის შემდეგ გაერთიანებული სამეფოს ხელისუფლებას ერთი ნაბიჯიც კი არ გადაუდგამს კომპრომისისა და შეთანხმებისკენ.

ევროკავშირიდან გასვლის შესახებ კანონპროექტის საბოლოო ეტაპის განხილვა გაერთიანებული სამეფოს პარლამენტში, სავარაუდოდ გვიან ორშაბათს დასრულდება. ამის შემდეგ კი პრემიერ-მინისტრს მიეცემა საშუალება 50-ე მუხლის ინიცირებისა, რომელიც, სავარაუდოდ, სამშაბათს ფორმალურად დაიწყებს ბრექსიტის პროცესს.

ბრექსიტის რეფერენდუმში შოტლანდიის მოქალაქეების 62-მა პროცენტმა ევროკავშირში დარჩენას მისცა ხმა, თუმცა საერთო ჯამში გაერთიანებულმა სამეფომ საწინააღმდეგო შედეგი მიიღო.