ქართული ოცნების დეპუტატის, გია ვოლსკის შეფასებით, გიგი უგულავას ფოთში მერობაზე პერსპექტივა არ გააჩნია. მისი თქმით, უგულავა "ქურდბაცაცა ადამიანია".

"პერსპექტივა ნამდვილად არ გააჩნია. ფოთელი იქნება, გორელი თუ თბილისელი, ყველამ იცის, ვისთან აქვს საქმე. ეს არის ქურდბაცაცა ადამიანი, რომელსაც ერთი აქვს მარტო, რომ დიდი, მაღალი ხმით შეიძლება იყვიროს და აღშფოთება გაითამაშოს ჩვენს თვალწინ. დანარჩენი არაფერი აღარ აქვს, გაკოტრებული პოლიტიკოსია და არც სხვა სპეციალობა არ გააჩნია", — განაცხადა მან.

თვითმმართველობის არჩევნებზე ფოთში ოპოზიციის კანდიდატი გიგი უგულავა იქნება. ინფორმაცია On.ge-ს ნაციონალურ მოძრაობაში დაუდასტურეს.

აქამდე ვრცელდებოდა ინფორმაცია, რომ კანდიდატებად თინა ბოკუჩავა და ბექა ბასილაია განიხილებოდნენ. გიგი უგულავა თვითმმართველობის არჩევნებზე ნაციონალური მოძრაობის სახელით წარსდგება, მიუხედავად იმისა, რომ პარტიის წევრი არ არის. ენმ-ს წევრი ნიკა ობოლაძის თქმით, უგულავა ფოთში ოპოზიციის მთავარ კანდიდატად განიხილება და მისი აზრით, რეფერენდუმის წევრი სხვა პარტიები მას კონკურენტებს არ დაუყენებენ:

"კონსულტაციები მიმდინარეობს და ალბათ, ლოგიკური იქნება, თუ გიგი უგულავა იქნება მთავარი ოპოზიციური კანდიდატი ფოთში და მას სხვა ოპოზიციური პარტიები არ დაუყენებენ კონკურენტებს", — აცხადებს ობოლაძე.

საქართველოში თვითმმართველობის არჩევნები 2 ოქტომბერს გაიმართება. თითქმის მთელი საქართველოს მასშტაბით ოპოზიციის დიდმა ნაწილმა კანდიდატებთან დაკავშირებით შეთანხმებას მიაღწია. ჯერჯერობით უცნობია ლელოს პოზიცია, ხოლო სტრატეგია აღმაშენებელი და ლეიბორისტული პარტია კანდიდატებს დამოუკიდებლად აყენებენ. არჩევნებში ჩართულია ექსპრემიერ გიორგი გახარიას პარტიაც, თუმცა ის ოპოზიციასთან არ თანამშრომლობს.