ბოლო ინფორმაციით, ჰაიტის მიწისძვრას 1941 ადამიანი ემსხვერპლა, ხოლო დაშავებულია 10 000-მდე. მიწისძვრა 14 აგვისტოს მოხდა და ძლიერი ნგრევა გამოიწვია. სამაშველო სამუშაოებს ხელი შეუშალა ძლიერმა წვიმამ, უამინდობამ და წყალდიდობამ.

Aljazeera ოფიციალურ პირებზე დაყრდნობით წერს, რომ მიწისძვრამ გაანადგურა 7000-ზე მეტი სახლი და დააზიანა თითქმის 5000, ხოლო 30 000-მდე ოჯახი უსახლკაროდ დარჩა. ასევე დაინგრა ან ძლიერ დაზიანდა საავადმყოფოები, სკოლები, ოფისები და ეკლესიები. ადგილობრივები დახმარებას ითხოვენ.

UNICEF-ის შეფასებით, მიწისძვრის შედეგად დაახლოებით 1,2 მილიონი ადამიანი, მათ შორის 540 000 ბავშვი დაზარალდა.

ფოტო: UNICEF

7,2 მაგნიტუდის სიმძლავრის მიწისძვრა 10 კილომეტრის სიღრმეზე დედაქალაქ პორტ-ო-პრენსიდან 150 კილომეტრში მოხდა. მიწისძვრის შემდეგ, აშშ-ს ცუნამის განგაშის სისტემამ ცუნამის გაფრთხილება გასცა.

აღსანიშნავია, რომ ჰაიტიზე 2010 წლის 12 იანვარს 7,0 მაგნიტუდის სიმძლავრის მიწისძვრა მოხდა, რომლის შედეგადაც 200 000-ზე მეტი ადამიანი დაიღუპა.