თუ სათაური კიდევ ერთხელ გადაიკითხეთ და ვერაფერი გაიგეთ, ეს სტატია თქვენთვისაა. იქნებ, სწორედ თქვენ გჭირდებათ ანგიოლოგთან ვიზიტი და ამის შესახებ აქამდე არაფერი იცოდით?

ანგიოლოგი სისხლძარღვთა და ლიმფური სადინრების ჯანმრთელობაზე ზრუნავს და მასთან პროფილაქტიკური ვიზიტი საჭირო არ არის, მაგრამ არსებობს გავრცელებული დისკომფორტები, რომელთა მიზეზი და აღმოფხვრის გზებიც მის კაბინეტში უნდა ვეძებოთ.

მიზეზი #1 — გაწუხებთ დისკომფორტი სიარულისას

ფოტო: Shutterstock

სეირნობისას ან უბრალოდ, სიარულისას, შესაძლოა, ქვედა კიდურების ტკივილი და დისკომფორტი გაწუხებდეთ, რაც უმეტესად პერიფერიული არტერიული დაავადების მანიშნებელია.

შევიწროებული არტერიები კიდურებში სისხლის დინებას ზღუდავენ, რაც შესაძლოა არტერიებში ცხიმოვანი უჯრედების დაგროვების იწვევდეს.

მაპროვოცირებელი ფაქტორებია:

  • ოჯახური ანამნეზი
  • ქოლესტერინის მაღალი დონე
  • ჭარბი წონა
  • დაბალი ფიზიკური აქტივობა
  • და რაც მთავარია — თამბაქოს აქტიური მოხმარება

დისკომფორტის ხარისხი დამოკიდებულია არტერიების შევიწროების დონეზე, მისი უყურადღებოდ დატოვება სისხლძარღვების დაზიანებას და სხვადასხვა პათოლოგიას იწვევს.

მიზეზი #2 — მკვეთრად გეტყობათ ვენები ფეხებზე

ფოტო: Shutterstock

ვენური დაავადებების სიმპტომები მრავალფეროვანია:

  • ფეხის შესიება (რომელსაც, ხშირად, ზაფხულის სიცხეს ან სხვა გარემო პირობებს ვაბრალებთ)
  • ტკივილი
  • მოლურჯო ვენური სურათი
  • უეცარი, აუხსნელი ჭრილობები
  • წერტილოვნად გამოხატული ვენური სურათი
  • ქავილი
  • კიდურის გამკვრივება ან ფერის ცვლილება

ყველაფერი ეს, შესაძლოა ვარიკოზული ვენების მანიშნებელი იყოს. გაგანიერებული ვენები ვიზუალურადაც შესამჩნევია. მისი გამომწვევი მიზეზი შეიძლება იყოს კიდურებზე დიდი ზეწოლა, ორსულობა, ოჯახური ანამნეზი, ფეხზე დიდხანს დგომა და რა თქმა უნდა - ასაკი, რომელთან ერთადაც ვენები ელასტიურობას კარგავს.

მიზეზი #3 — აპირებთ გაიკეთოთ ანტიცელულიტური/გამაჯანსაღებელი მასაჟი

ფოტო: Shutterstock

თუ დარწმუნებული არ ხართ საკუთარი ვენების ჯანმრთელობაში, თუმცა მასაჟის ინტენსიური კურსის გავლას აპირებთ, შესაძლოა დაფიქრებად ღირდეს.

  • მოიასამნისფრო ვენების, ან კაპილარული სურათი ხომ არ გაქვთ გამოხატული?
  • ზემოთ არსებულ პუნქტებში ნახსენები დისკომფორტი ხომ არ გაწუხებთ?
  • ან საერთოდ, ვენური უკმარისობის, ვარიკოზისა და სხვა პათოლოგიების ოჯახური ანამნეზი ხომ არ გაქვთ?

თუ პასუხი დადებითია, ან თუ დარწმუნებით იცით, რომ ობობის ვენები ან ვარიკოზი გაქვთ, ანგიოლოგთან კონსულტაციის გავლა აჯობებს. მასაჟების უმეტესობა სხეულზე ვაკუუმისა თუ სხვა საშუალებების ძლიერი ზეწოლით ტარდება, რამაც შესაძლებელია სუსტი ვენები კიდევ უფრო დააზიანოს. ღრმა ვენური თრომბოზის მქონე პაციენტების შემთხვევაში, შედედებული სისხლის მასა დაძრას და გადააადგილოს, რაც საბოლოოდ არასასურველ შედეგს გამოიღებს.

ამ სამი მიზეზის გათვალისწინებით, დროულად მიღებული კონსულტაცია ყველანაირი გართულების პრევენციაა.

აქციეთ ჯანმრთელობაზე ზრუნვა ჩვევად!