ჯერ კიდევ 20 წლით ადრე, სანამ მსოფლიოში კოვიდრეგულაციები დაწესდებოდა, სერბმა პანტა პეტროვიჩმა სოციალური დისტანცირება და ერთ-ერთ გამოქვაბულში გადასახლება გადაწყვიტა.

გასულ წელს, როცა გრძელ წვერსა და დრედებში გამოწყობილი კაცი ქალაქს ესტუმრა, გაიგო, რომ მსოფლიოში პანდემია მძვინვარებდა. ცოტა ხნის წინ კი, როცა კორონავირუსის საწინააღმდეგო ვაქცინა ხელმისაწვდომი გახდა, დაუფიქრებლად გადაწყვიტა აცრა და სხვებსაც იმავეს გაკეთებისკენ მოუწოდა.

"ვირუსმა გარჩევა არ იცის, ჩემს გამოქვაბულამდეც მოაღწევს", — ამბობს 70 წლის კაცი AFP-სთან ინტერვიუში.

პეტროვიჩის თქმით, არაფრით ესმის ვაქცინის სკეპტიკოსების. ის ფიქრობს, რომ [ვაქცინაციის] პროცესი მხოლოდ დაავადების მოსპობისკენაა მიმართული.

"სამივე დოზის მიღება მინდა — დამატებითისაც. ყველა მოქალაქეს მოვუწოდებ, აიცრას".

სოციალური დისტანცია ბოლო 20 წლის განმავლობაში

ფოტო: AFP

პეტროვიჩის სახლამდე მიღწევა ადამიანებისთვის ადვილი სულაც არაა. იქამდე მისვლა მხოლოდ კლდეზე აცოცებით შეიძლება.

"ბინა" კი მოკრძალებულადაა მოწყობილი — კაცს მხოლოდ რამდენიმე სკამი, საწოლად თივის რულონი და ძველი, ჟანგმოკიდებული სააბაზანო ნიჟარა აქვს, რომელსაც ტუალეტად იყენებს.

პეტროვიჩი წლების განმავლობაში შავ ბაზარსა და უცხოეთში მუშაობდა. რამდენჯერმე იყო დაქორწინებული, თუმცა, მოგვიანებით, ბუნების მოყვარულმა ხასიათმა საზოგადოებისგან იზოლირებისაკენ უბიძგა. ამბობს, რომ ასე არნახული თავისუფლება იგემა.

"ქალაქში თავისუფალი არ ვიყავი. ყოველთვის ვიღაც გეღობება გზაზე — ან ცოლს ეკამათები, ან მეზობლებს, ანდაც პოლიციას", — აღნიშნავს კაცი ღიმილით, — "აქ კი, არავინ არ მეჩხუბება".

პეტროვიჩი უმეტესად თევზებით და სოკოთი იკვებება, თუმცა, ხანდახან მოლაშქრეების ნარჩენებსაც აწყდება. ქალაქში სიარული კი არცთუ დიდი ხნის წინ დაიწყო, როცა გამოქვაბულთან მოშინაურებული ცხოველები მგელმა შეუჭამა.

იზოლაციამდე კაცმა საზღვარგარეთ ნაშოვნი მთელი თავისი ფული ქალაქში სამი პატარა ხიდის აშენებას შესწირა.

"ფული დაწყევლილია, ხალხს აფუჭებს. ვფიქრობ, ფულის მსგავსად ადამიანის გარყვნა სხვა არაფერს შეუძლია", — დასძენს პეტროვიჩი.

ფოტო: AFP

ერთ-ერთი ხიდის თავზემოთ მან სამტრედეც ააშენა და, ასაკის მიუხედავად, ყოველთვის ყოჩაღად ადის პურის ნამცეცებით ფრინველების გამოსაკვებად.