საქართველოს პრემიერმინისტრმა, ირაკლი ღარიბაშვილმა გურჯაანის მერობის კანდიდატის წარდგენაზე სიტყვით გამოსვლისას ისევ ქართული ოცნების დამფუძნებელზე ბიძინა ივანიშვილზე ილაპარაკა. მისი მტკიცებით, "ბიძინა ივანიშვილის ხელისუფლების დამსახურება" არის ის, რომ ქვეყანაში სტაბილურობა დამკვიდრდა.

"ქართული ოცნება, ამას ყოველთვის შევახსენებ ჩვენს ოპონენტებს და ყველას, ერთადერთი პოლიტიკური ძალა, რომელმაც აიღო პასუხისმგებლობა ჩვენი ქვეყნისა და ხალხის დაცვაზე არის სწორედ ჩვენი ხელისუფლება. ბიძინა ივანიშვილის ხელისუფლების დამსახურება არის ის, რომ ქვეყანაში დამკვიდრდა, დასადგურდა გრძელვადიანი, უწყვეტი მშვიდობიანი და სტაბილური პერიოდი, რამაც მოიტანა განვითარება", — განაცხადა ღარიბაშვილმა.

პრემიერმინისტრმა ისაუბრა იმაზეც, რომ სწორედ ივანიშვილის "პოლიტიკის შედეგია" სოფლის მეურნეობაში ინვესტიციების ზრდა და ის, რომ ბოლო 8 წელიწადში ამ სფეროში 2 მილიარდზე მეტი არის ინვესტირებული.