ეროვნულ-დემოკრატიული ინსტიტუტის (NDI) კვლევის თანახმად, გამოკითხული მოსახლეობის 47% უარს ამბობს კორონავირუსის საწინააღმდეგო ვაქცინის გაკეთებაზე, 35% ამბობს, რომ თანახმაა აცრაზე, 7% — უკვე აცრილია, ხოლო 11%-მა არ იცის გაიკეთებდა თუ არა აცრას.

ფოტო: NDI

კვლევის მიხედვით, სხვადასხვა მიზეზს ასახელებენ ისინი, ვინც უარი თქვეს ვაქცინის გაკეთებაზე. კერძოდ, რატომ არ აიცრებოდი, კითხვის საპასუხოდ, 47% ამბობს, რომ არ ენდობა კორონავირუსის საწინააღმდეგო ვაქცინის ხარისხს, 20% ვერ აირცება ჯანმრთელობასთან დაკავშირებული პრობლემების გამო, 13%-ის აზრით, პანდემიას ვაქცინის გარეშეც გავუმკლავდებით. ამასთან, 7% ფიქრობს, რომ ვაქცინაციას სინამდვილეში სხვა მიზეზი აქვს, ხოლო 2% ვაქცინის წინააღმდეგია.

ფოტო: NDI

კვლევა საზოგადოების განწყობა საქართველოში NDI-ის დაკვეთით CRRC საქართველოს მიერ ჩატარდა. კვლევა დიდი ბრიტანეთის მთავრობის UK aid-ის ფინანსური ხელშეწყობით ხორციელდება,

აღნიშნული კვლევა 13-25 ივლისის პერიოდში საქართველოს მასშტაბით 2 016 სატელეფონო ინტერვიუს წარმომადგენლობითი შერჩევის საფუძველზე, ქვეყნის სრულწლოვან მოსახლეობას შორის ჩატარდა (ოკუპირებული ტერიტორიების გამოკლებით). გამოკითხვის საშუალო ცდომილების ზღვარი არის +/- 1.3%. ამასთან, ცდომილების ზღვარი კითხვების მიხედვით იცვლება. რესპონდენტები შემთხვევითი შერჩევის გზით — ნომერზე დარეკვის მეთოდით, შეირჩნენ. ინტერვიუები ჩატარდა ქართულ, აზერბაიჯანულ, სომხურ და რუსულ ენებზე.