ბათუმში მიმდინარე აქციის დროს უკვე მეოთხე ადამიანი დააკავეს. მანამდე საპატრულო ეკიპაჟმა პოლიციის განყოფილებაში 2 პირი გადაიყვანა, რასაც არეულობა მოჰყვა.

ყველაფერი იმით დაიწყო, რომ პატრულმა მოძრაობის შეფერხებისთვის მოქალაქე დააჯარიმა. შსს-ს მტკიცებით, მან პოლიციას წინააღმდეგობა გაუწია და სიტყვიერი შეურაცხყოფა მიაყენა, შსს აცხადებს, რომ მას გამოესარჩლა მეორე პირიც და პოლიციას ხელი შეუშალა სამუშაოს შესრულებაში.

ბათუმელები თვითმხილველების ინფორმაციით წერს, რომ მოქალაქემ პოლიციის მისამართით შეიგინა, რასაც პოლიციელების მხრიდან მოქალაქეზე ფიზიკური ძალადობა მოჰყვა.

ამ დროისთვის, ბათუმში აქცია ბათუმი პლაზას შენობასთან და აჭარის პოლიციის დეპარტამენტის ადმინისტრაციასთან მიმდინარეობს. აქციის მონაწილეები ითხოვენ რომ დაკავებულები დაუყოვნებლივ გათავისუფლდნენ.

მათივე მოთხოვნით აჭარის საპატრულო პოლიციის უფროსი უნდა გადადგეს. აქციის მონაწილეები მიიჩნევენ, რომ აჭარის საპატრულო პოლიციის ახალი უფროსის, კახა ბუხრაძის დანიშვნის შემდეგ დაიწყო ქალაქში მძღოლების მიზანმიმართული დაჯარიმება.