დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, სამედიცინო პერსონალის 46%-ია აცრილი. გამყრელიძის თქმით, ყველაზე მეტი აქედან ექიმები არიან. მისივე თქმით, ექიმების 33% ამ პერიოდში დაინფიცირდა. სამედიცინო პერსონალის გარდაცვალების შემთხვევები კი 80-მდეა.

"სკოლის პედაგოგებში 24-დან 30%-მდე აცრის მაჩვენებელი გვაქვს, რომელიც არ არის ცუდი. ეს საერთო აცრის მაჩვენებელზე ბევრად მეტია, მაგრამ საჭიროა უფრო მეტი", — განაცხადა გამყრელიძემ TV პირველის ეთერში.

Stopcov.ge-ს მონაცემებით, ამ დროისათვის სულ აცრილია 641 242 ადამიანი.

9 აგვისტოს მონაცემებით, საქართველოში კორონავირუსის 2 236 ახალი შემთხვევა დადასტურდა, გამოჯანმრთელდა 3 146, ხოლო გარდაიცვალა — 44 ადამიანი.

ბოლო 24 საათში ქვეყნის მასშტაბით ჩატარდა 23 439 კვლევა ტესტით, მათ შორის, 12 524 კვლევა ანტიგენის ტესტით და 10 915 PCR ტესტით.

რაც შეეხება დადებითობის მაჩვენებელს, 9 აგვისტოს მდგომარეობით, დადებითობის დღიური მაჩვენებელი არის 9,54%, ბოლო 7 დღის მანძილზე — 9,75%, ხოლო 14 დღის მანძილზე — 8,74%.

პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 450 149-ს, ჯამში გამოჯანმრთელებულთა რაოდენობა გაიზარდა 403 762-მდე, ხოლო ვირუსს ჯამში 6 128 პირი ემსხვერპლა.