ღია სივრცეში პირბადის ტარება სავალდებულო ხდება ყველგან, სადაც 5-ზე მეტი ადამიანი იკრიბება. რეგულაცია ძალაში ხვალიდან შევა. ამის შესახებ საკოორდინაციო საბჭოს სხდომის შემდეგ გახდა ცნობილი.

"დღეს ვართ პირბადის გამოყენების 51%-იან გამოყენებაზე. თუ ეს მაჩვენებელი გაიზრდება და გადააჭარბებს 90%-ს ეს მოგვცემს, სულ მცირე, დღიური შემთხვევების 1 000 ერთეულით შემცირების საშუალებას. პროგნოზული მაჩვენებელი ასეთია. ამდენად, პირბადე არის ერთ-ერთ მთავარი მექანიზმი", — განაცხადა ჯანდაცვის მინისტრის მოადგილემ.

საოპერაციო საბჭოს წევრის, გიორგი ღიბრაძის განმარტებით, ჯარიმა პირბადის ტარების წესის დარღვევაზე იგივე იქნება, რაც აქამდე — 20 ლარი. კითხვაზე, მოსალოდნელია თუ არა, რომ ამ დარღვევის ჯარიმებიც გაუქმდება, ღიბრაძე პასუხობს:

"საქართველოს მთავრობა ჯარიმებს ვერ ჩამოწერს, ეს არის საბოლოო ჯამში პარლამენტის გადასაწყვეტი. უნდა იქნას მიღებული შესაბამისი საკანონმდებლო აქტი. აღნიშნული პროექტი ითვალისწინებს 23 ივნისამდე დამრღვევებისთვის ამნისტიის გამოცხადებას. იმ პერიოდიდან შემდგომ არანაირი განხილვა არ ყოფილა და, ალბათ, არც იქნება. ვნახოთ, შეეტყობა სიტუაციას".

გარდა ამისა, საბჭოს სხდომის შემდეგ ცნობილი გახდა, რომ გამკაცრდება სხვა მოქმედი რეგულაციების აღსრულებაზე კონტროლი;

  • მთავრობის დადგენილებით, აკრძალულია სოციალური ღონისძიებების, ქორწილის, ქელეხი, იუბილე და სხვა, მსგავსი ღონისძიების მასნპინძლობა. ამ წესის დარღვევისთვის დარბაზის და ობიექტის მფლობელი პირველ ჯერზე დაჯარიმდება 10 000 ლარით, განმეორებისას დალუქავენ;
  • აკრძალულია ღია და დახურულ სივრცეში ღამის კლუბების ფუნქციონირება და ამ რეგულაციის შესრულება უფრო მკაცრად გაკონტროლდება;
  • კვების ობიექტების მუშაობა შეზღუდულია 00 საათიდან 5 საათამდე პერიოდში, რის აღსრულებასაც სახელმწიფო კიდევ უფრო გაამკაცრებს;
  • კოვდიგდატანილი პირები, ვისაც აქვს გაკეთებული ერთხელ ვაქცინა გათანაბრდებიან 2 დოზა ვაქცინირებულთან და გავრცელდება იგივე რეგულაცია, რაც არის სრულად ვაქცინირებული პირებისთვის.

პირბადეზე რეგულაცია ადრეც მოქმედებდა, ოღონდ ტარება ყველგან სავალდებულო იყო. შეზღუდვა 22 ივნისს საბჭოს გადაწყვეტილებით მოიხსნა. მაშინ პრემიერმინისტრმა განაცხადა, რომ ძალაში რჩებოდა რეკომენდაცია და ვისაც სურვილი ჰქონდა, უნდა ეტარებინა. ხოლო დახურულ სივრცეებში, საზოგადოებრივ ტრანსპორტში და ასევე, საზოგადოებრივი ტრანსპორტის გაჩერებებზე პირბადის ტარება სავალდებულო იყო და დღემდე არის.

NCDC-ის დირექტორი, ამირან გამყრელიძე ამბობდა, რომ თუ თუ პირბადის ტარების რიცხვს 95%-მდე გავზრდით, ახალი შემთხვევები 70%-ით შემცირდება.