შინაგან საქმეთა სამინისტრომ სარგებლობაში ან საკუთრებაში არსებული იარაღისა და საბრძოლო მასალის ტარების, შენახვის, გადატანა-გადაზიდვისა და გადაგზავნისა წესში ახალი რეგულაციები დაამტკიცა.

სანადირო იარაღი

სანადირო იარაღის ტარება დასახლებულ პუნქტში ან/და მის მიმდებარე ტერიტორიაზე 500 მეტრის რადიუსში დასაშვები იქნება მხოლოდ სპეციალური შალითით. აუცილებელია, რომ იარაღი იყოს ვაზნებისგან განცალკევებული და დამაგრებული ჰქონდეს უსაფრთხოების საკეტი ან უნდა იყოს არასრულად დაშლილი.

იარაღის არასრული დაშლა

მინისტრის ბრძანებით, დეტალურად განისაზღვრა იარაღის არასრული დაშლის განმარტება. კერძოდ, იარაღი არასრულად დაშლილად ჩაითვლება, თუ მისი ძირითადი ელემენტები განცალკევდება სპეციალური ხელსაწყოების გამოყენების გარეშე. ბუნებრივია ეს მოთხოვნა არ ვრცელდება იმ იარაღებზე, რომელთა კონსტრუქციაც არ იძლევა ამის შესაძლებლობას.

იარაღის შენახვა

ახალი რეგულაციების მიხედვით, იარაღი და საბრძოლო მასალა უნდა ინახებოდეს ისეთ მდგომარეობასა და პირობებში, რომ გამორიცხული იყოს გაუთვალისწინებელი გასროლა და იარაღთან გარეშე პირთა დაშვების შესაძლებლობა. იარაღი ან საბრძოლო მასალა უნდა შეინახოთ დაკეტილ სათავსოში ან/და იარაღს დამაგრებული უნდა ჰქონდეს უსაფრთხოების საკეტი.

აკუსტიკური (ხმოვანი) იარაღი

ხმოვანი (აკუსტიკური) იარაღის ტარება სრულად აიკრძალა, გარდა იმ შემთხვევებისა, თუ იგი გადაიტანება თეატრალურ წარმოდგენებში, კინო და სატელევიზიო ჩვენებებში, ისტორიულ რეკონსტრუქციებში, აღლუმებსა და სპორტულ ღონისძიებებში გამოყენების მიზნით. ამ მიზნით ხმოვანი (აკუსტიკური) იარაღის გადატანისას მფლობელს თან უნდა ჰქონდეს შესაბამისი მიზნის დამადასტურებელი ოფიციალური დოკუმენტი, რომლის გამოყენებაც დასაშვები იქნება ერთჯერადად.