აგვისტოს ომიდან მე-13 წელს გაეროს უშიშროების საბჭო კიდევ ერთხელ ადასტურებს ურყევ მხარდაჭერას საქართველოს დამოუკიდებლობის, სუვერენიტეტისა და ტერიტორიული მთლიანობისადმი მის საერთაშორისოდ აღიარებულ საზღვრებში. ასევე, გამოთქვამს წუხილს, რომ საქართველოს ტერიტორიული მთლიანობა კვლავ ირღვევა და რუსეთს კიდევ ერთხელ მოუწოდებენ, სრულად შეასრულოს 2008 წლის 12 აგვისტოს შეთანხმება. ამის შესახებ განცხადება უშიშროების საბჭოს წევრმა ქვეყნებმა დახურული სხდომის შემდეგ გამოაქვეყნეს.

სხდომაზე განიხილეს რუსეთის მიერ ოკუპირებულ ტერიტორიებზე არსებული ვითარება, რაზეც სხდომის შემდეგ გაკეთდა განცხადებები და ასევე განცხადებაშია, რომ:

• გმობენ რუსეთის უწყვეტ პროვოკაციებს, როგორიცაა საქართველოს მოქალაქეთა გატაცება, სამხედრო წვრთნები ოკუპირებულ რეგიონებში, ადმინისტრაციული საზღვრის ჩაკეტვა, ე.წ. ბორდერიზაცია, ეთნიკური ქართველების დისკრიმინაციას გალსა და ახალგორში და ა.შ.;
• რუსეთს მოუწოდებენ, გაათავისუფლონ უსამართლოდ დაკავებული ირაკლი ბებუა და საქართველოს სხვა მოქალაქეები;
• ნახსენებია 2021 წლის იანვარში სტრასბურგის ადამიანის უფლებათა სასამართლოს მიერ მიღებულ გადაწყვეტილება, რომლის მიხედვითაც, რუსეთის ფედერაციას, როგორც სახელმწიფოს, რომელიც ახორციელებს ოკუპირებული რეგიონების ეფექტურ კონტროლს, ეკისრება პასუხისმგებლობა აქ ჩადენილ ადამიანის უფლებათა მძიმე დარღვევებზე;
• გამოთქვამენ წუხილს, რომ საქართველოს ოკუპირებულ ტერიტორიებში ვერ ხერხდება ჰუმანიტარული მდგომარეობის კონტროლის მონიტორინგის შეუზღუდავი მექანიზმების დაშვება;
• მხარს უჭერენ ჟენევის საერთაშორისო მოლაპარაკებებს;
• კიდევ ერთხელ მოუწოდებენ რუსეთს 2008 წლის 12 აგვისტოს შეთანხმების სრულად შესრულებისკენ.

სხდომის დასრულების შემდგომ კი სპეციალური მხარდამჭერი განცხადება გააკეთეს შეერთებული შტატებისა და გაერთიანებული სამეფოს წარმომადგენლებმა.

"დღეს ჩვენ კიდევ ერთხელ მოვუწოდებთ რუსეთის ფედერაციას, სრულად შეასრულოს მის მიერ 2008 წლის 12 აგვისტოს შეთანხმების და ამ შეთანხმების შემდგომი განსახორციელებელი ზომების თაობაზე 8 სექტემბრის შეთანხმების მიხედვით აღებული ვალდებულებები; დაუყოვნებლივ გაიყვანოს თავისი სამხედრო და უსაფრთხოების ძალები, გააუქმოს საქართველოს ტერიტორიების აფხაზეთისა და ცხინვალის რეგიონის/სამხრეთ ოსეთი ე.წ. დამოუკიდებლობის აღიარება და არ შეაფერხოს საერთაშორისო უსაფრთხოების მექანიზმის შექმნის პროცესი", — განაცხადა ევროპისა და ცენტრალური აზიის საკითხებში გაერო-ს გენერალური მდივნის თანაშემწემ, მიროსლავ იენჩმა [რუსთავი2-ის თარგმანი].

გაეროში საქართველოს მუდმივმა წარმომადგენელმა, კახა იმნაძემ, განცხადების ავტორებს საქართველოსთვის ურყევი მხარდაჭერისთვის ტვიტერზე მადლობა გადაუხადა.

გაიგეთ მეტი:

• გაერომ საქართველოს ოკუპირებული ტერიტორიებიდან დევნილთა სტატუსის შესახებ რეზოლუცია მიიღო
• საქართველოს დევნილთა და ლტოლვილთა სტატუსის შესახებ გაერომ რეზოლუცია მიიღო
• 2008 წლის ომის საქმეზე სტრასბურგის სასამართლომ საქართველოს სარჩელი ძირითადად დააკმაყოფილა