"ყველასთვის ცნობილია რუსეთის მზარდი თავდაცვითი მიზნები, წვრთნები საზღვრებთან, სამხედრო ობიექტების გახსნა, რაც ჩვენი შეშფოთების საგანია. რუსეთი თავისი აგრესიული თუ პოტენციურად აგრესიული ქმედებებით გვაიძულებს სიფრთხილეს, მაგრამ ამ ყველაფერზე ერთად საუბარია საჭირო" - ეს განცხადება ნატოს გენერალური მდივნის სპეციალურმა წარმომადგენელმა კავკასიასა და ცენტრალურ აზიაში, ჯეიმს აპატურაიმ თბილისში, თავდაცვისა და უსაფრთხოების რიგით მე-10 კონფერენციაზე დღეს გააკეთა.

რუსეთიდან მომდინარე საფრთხეებზე ისაუბრა ასევე ატლანტიკური საბჭოს ვიცე-პრეზიდენტმა, დეიმონ უილსონმაც. მან განაცხადა, რომ საქართველოსთვის ყველაზე მნიშვნელოვანია ალიანსის ერთსულოვნება რუსეთის შეკავების სტრატეგიაში. უილსონმა ასევე განმარტა, რომ ნატო თავისი ძალებისა და ინსფრასტრუქტურის ნაწილს აღმოსავლეთით სწევს, რაც რუსეთისთვის ძალიან მკაფიო სიგნალია იმაზე, რომ ხელები შორს გაწიოს და კიდევ ერთხელ არ დააზიანოს ევროპის უსაფრთხოება.

გარდა ზემოაღნიშნულისა, აპატურაიმ საქართველოსა და ნატოს ურთიერთობაში წინ გადადგმულ ნაბიჯებზეც ისაუბრა და განმარტა, რომ ვარშავის სამიტზე სხვა არაწევრ სახელმწიფოებთან შედარებით საქართველო მეტად წარმომადგენლობითი იქნება, თუნდაც შეხვედრების რაოდენობით:

"მეტი ნატო საქართველოში. ამ თვალსაზრისით ჩვენ ვასრულებთ პირობას, რადგან აქ ჩრდილოატლანტიკური ალიანსის არაერთი მრჩეველია. გავხსენით ერთობლივი საწვრთნელი ცენტრი, ტარდება მეტი წვრთნები. რაც შეეხება ნატოში მეტ საქართველოს, გეტყვით, რომ ვარშავის სამიტზე თქვენი ქვეყანა მთავრობის მეთაურების შეხვედრებში მიიღებს მონაწილეობას, საგარეო საქმეთა და თავდაცვის მინისტრების დონეზე. ეს რაც შეეხება სამიტს. შემდეგ კი იქნება მეტი ახალი იდეა. თქვენ იხილავთ ახალ ინიციატივებს".

საქართველოს თავდაცვისა და უსაფრთხოების რიგით მე-10 კონფერენცია თბილისში დღეს, 24 მაისს, გაიხსნა და მას საქართველოს მთავრობის წევრები, ექსპერტები, დიპლომატები და სამოქალაქო საზოგადოების წარმომადგენლები ესწრებიან.