პრემიერმინისტრი, ირაკლი ღარიბაშვილი რადიო თავისუფლების ჟურნალისტის მიერ გასაჯაროებული ჩანაწერების ერთ-ერთ ფრაგმენტის ნამდვილობის დადასტურებასთან დაკავშირებით ამბობს, რომ არ იცის და არ არის საინტერესო.

მანამდე ღარიბაშვილმა გასაჯაროებულ ჩანაწერებს შეთქმულება და ბინძური პროვოკაცია უწოდა.

რადიო თავისუფლების ჟურნალისტმა, გიორგი მგელაძემ 2 აგვისტოს განაცხადა, რომ გამოქვეყნებული ჩანაწერების ერთი ფრაგმენტი მის საუბარს ასახავს.

მთავარი არხის დირექტორმა ნიკა გვარამიამ განაცხადა, რომ მოიპოვა სახელმწიფო უსაფრთხოების სამსახურის დოკუმენტები, სადაც პოლიტიკოსებზე, სასულიერო პირებზე, ჟურნალისტებზე, ბიზნესმენებზე, საჯარო მოხელეებზე თვალთვალია ასახული. სავარაუდოდ, სუს-ის ჩანაწერებიდან, ირკვევა, რომ უწყებაში აქვთ ინფორმაცია ხსნებული საზოგადოებაში აქტიური პირების სექსუალური ორიენტაციის, პირადი ცხოვრების, სექსუალური პარტნიორების შესახებ და ეს ყველაფერი აღწერილია უწყების დოკუმენტში. ისევე, როგორც ჟურნალისტების სატელეფონო ზარები სხვადასხვა უწყებების პრესსამსახურებთან. გვარამია ამბობს, რომ ეს ჩანაწერები ქართული ოცნების დამფუძნებლის, ბიძინა ივანიშვილისთვის კეთდება და პროცესში სუს-ის უფროსები არიან ჩართული.