პარტია საქართველოსთვის პოლიტიკური საბჭოს წევრი, ბექა ლილუაშვილი აცხადებს, რომ შარლ მიშელის შეთანხმების ანულირებით ქართულმა ოცნებამ დაადასტურა, რომ "უკიდურესად შეშინებულია". ის ამბობს, რომ შეთანხმების ანულირების საფუძველი მმართველ პარტიას ნაციონალურმა მოძრაობამ მისცა. ექსპრემიერ გიორგი გახარიას პარტიის ერთ-ერთი ლიდერი აცხადებს, რომ ამის მიზეზი პარტია საქართველოსთვის რეიტინგის ზრდით გამოწვეული შიში გახდა.

"ეს გადაწყვეტილება არის კიდევ ერთი აღიარება, რომ ისინი [ქართული ოცნება] არიან უკიდურესად შეშინებულები. ნაცმოძრაობამ, თავის მხრივ, დაადასტურა, რომ არ მოაწერეს 19 აპრილის შეთანხმებას ხელი, რადგან ეს აწყობდა მმართველ პარტიას და სჭირდებოდა მას საფუძვლად, რომ შეთანხმება ანულირებულად გამოეცხადებინა.

აი ამ პოლიტიკურ თაღლითობას უპირისპირებენ ისინი თავიანთი შიდა პარტიული კვლევების მათთვის დრამატულ შედეგებს — რეალობას, სადაც პარტია საქართველოსთვის რეიტინგი კიდევ უფრო იზრდება. ამ რეალობით გამოწვეული შიშის საპირწონედ ორივე მხარე, კიდევ ერთხელ, საკუთარ ვიწროპარტიულ ინტერესს აყენებს ქვეყნის ინტერესებზე მაღლა", — განაცხადა ბექა ლილუაშვილმა.

რამდენიმეთვიანი პოლიტიკური კრიზისის შემდეგ, ევროკავშირის მედიაციითა და შარლ მიშელის პირადი ჩართულობით მიღწეული შეთანხმება ანულირებულია. ეს გადაწყვეტილება მმართველმა გუნდმა მიიღო, ბრალი კი ტრადიციულად ოპოზიციას დასდო.

ქართული ოცნების თავმჯდომარემ, ირაკლი კობახიძემ პარტიის პოლიტსაბჭოსა და უმრავლესობის სხდომის შემდეგ გამართულ ბრიფინგზე გამოაცხადა, რომ შეთანხმებას მხოლოდ ისინი ასრულებდნენ კეთილსინდისიერად, რაც არასწორია. მათი აზრით, 100 დღეში თავი ამოწურა დოკუმენტმა, რომლის გამოც შარლ მიშელი და კრისტიან დანიელსონი საქართველოს არაერთხელ ეწვივნენ და რომლის მიღებაშიც არაერთი ქვეყნის ელჩი იყო ჩართული.

გაიგე მეტი: