კულტურის მინისტრის, თეა წულუკიანის განცხადებით, საქართველოში სულ მცირე 3 სპეციალიზირებული, უახლესი ტექნიკით აღჭურვილი სამედიცინო დაწესებულება შეიქმნება, სადაც სპორტსმენებისთვის ე.წ. გენეტიკური ანალიზის კუნთის ქსოვილის შესწავლისა და სხვა ტიპის სამედიცინო გამოკვლევების ჩატარება იქნება შესაძლებელი.

"დაწესებულება სპორტსმენების ტრავმის შემდგომ სწრაფ და სრულყოფილ რეაბილიტაციას უზრუნველყოფს. სამედიცინო ცენტრების ბაზაზე, იმუშავებს თანამედროვე ტექნოლოგიებზე დაფუძნებული ისეთი ლაბორატორიები, სადაც შესაძლებელი იქნება ახალგაზრდა სპორტსმენებისათვის ე.წ. გენეტიკური ანალიზის (Genetic influence on athletic performance) კუნთის ქსოვილის შესწავლისა და სხვა ტიპის სამედიცინო გამოკვლევების ჩატარება, რაც საუკეთესო საშუალებაა სპორტსმენისათვის წარმატებული კარიერის დასაგეგმად", — განაცხადა მინისტრმა 10-წლიანი გეგმის წარდგენისას.

სამოქმედო გეგმაში სპორტის მიმართულებით სამინისტროს მიერ გადასადგმელი ნაბიჯებიდან თეა წულუკიანმა, ასევე, სასპორტო განათლების სისტემის შექმნაზე ისაუბრა, რომელიც სპორტის თითოეული სახეობისათვის კვალიფიციური კადრები უნდა მოამზადოს.