მთავარი არხის ჟურნალისტს, თათია წოწონავას ფიზიკური ანგარიშსწორებით და სიცოცხლის მოსპობით ემუქრებიან. ჟურნალისტმა შინაგან საქმეთა სამინისტროს მიმართა, უწყებამ გამოძიება მუქარის მუხლით დაიწყო.

10 ივლისს სოციალურ ქსელ ტიკ-ტოკში, ერთ-ერთმა მომხმარებელმა გავრცელა ვიდეო, რომელიც ასახავს თათია წოწონავას ჩართვას და ზედ დააწერა: "ამ ჟურნალისტს შუაზე ავჩეხავდი". კომენტარებში მომხმარებლების ნაწილმა წოწონავას მიმართ აგრესია გამოხატა და დაემუქრა, წოწონავას თქმით, მათ შორის იყვნენ ძალადობრივი და პრორუსული არხის, Alt-Info-ს წარმომადგენლები.

"ზოგადად, ჟურნალისტებზე თავდასხმები ბოლო პერიოდში თითქოს ჩვეულ სტილად იქცა. 5 ივლისის შემდეგ ხომ საერთოდ — ყოველდღიურად, არა მარტო მე, სხვა ჟურნალისტებიც იღებენ მუქარის გზავნილებს, პირად შეურაცხყოფებს. თუმცა, შეურაცხყოფებზე გასქელებული გვაქვს კანი ჩვენ, ჟურნალისტებს, მაგრამ, მუქარა უკვე სისხლის სამართლის დანაშაულია და უნდა დაიწყოს ამ ფაქტზე აუცილებლად მოკვლევა", — განაცხადა წოწონავამ.

ჟურნალისტი ამბობს, რომ ამის შესახებ დაახლოებით ერთი კვირის წინ სოციალურ ქსელში დაპოსტა და შინაგან საქმეთა სამინისტრო მონიშნა, თუმცა უწყებიდან არავინ დაკავშირებია, ამიტომ, 26 ივლისს პირადად შეიტანა განცხადება. დღეს, 27 ივლისს, წოწონავა გამოკითხვაზე უკვე მეორედ იმყოფებოდა. ჟურნალისტი 5 ივლისის შემდეგ დაცულად არ გრძნობს თავს და გამოძიების დასრულებას ელოდება.

დღე, 27 ივლისს ჟურნალისტებს სიტყვიერი შეურაცხყოფა მიაყენეს სახელმწიფო უსაფრთხოების სამსახურთანაც. მოქალაქე დავით ბაძგარაძე განსაკუთრებული აგრესიისით ფორმულას ჟურნალისტის მიმართ გამოირჩეოდა, რომელსაც უთხრა, რომ უნდა რცხვენოდეს იმ ტელევიზიაში მუშაობა, რომელიც დავით კეზერაშვილის დაფინანსებულია.