გიორგი გახარია, რომელიც 20 ივნისს შინაგან საქმეთა მინისტრი იყო, რა დროსაც სპეცდანიშნულების რაზმის მიერ აქციის დაშლის შედეგად ათეულობით ადამიანი დაშავდა, რამდენიმემ კი თვალი დაკარგა, ამ დღის "ყველაზე ნეგატიურ გმირად" ნიკა მელიას მოიხსენიებს. ექსპრემიერისა და ყოფილი შს მინისტრი უკმაყოფილოა, რომ მელია თბილისის მერობის კანდიდატია. მის თქმით, ეს მხოლოდ "უსუსურ ქართულ ოცნებას შეეძლო მოეხერხებინა".

"20 ივნისს სახელმწიფომ შეასრულა თავისი ფუნქცია, დაიცვა ქვეყანაში წესრიგი. სხვათა შორის ოცნების დღევანდელ "ბოსებს" მინდა გავახსენო, რომ 20 ივნისს დავიცავით მათი დღევანდელი მდგომარეობა. მიუხედავად იმ დიდი გულისტკივილისა, რომელიც საქართველოს თითოეულ მოქალაქეს და პირველ რიგში, მე დამრჩა 20 ივნისის შემდგომ, როდესაც მართლა დაშავდნენ ადამიანები, ქართულმა ოცნებამ, თავისი უსუსურობით, მიაღწია იმას, რომ 20 ივნისის ყველაზე მნიშვნელოვანი ნეგატიური გმირი, რომელიც მოუწოდებდა პარლამენტის შტურმისკენ, დღეს ოფიციალურად მერობის კანდიდატად არის წარდგენილი. მინდა "მივულოცო" ეს ქართული ოცნების დღევანდელ ბოსებს. როგორ მოახერხეს, რომ ადამიანი, რომელიც 20 ივნისს სახელმწიფო ინსტიტუტზე შტურმს ახორციელებდა და მოქალაქეებს, ახალგაზრდებს მოუწოდებდა პარლამენტში შეჭრისკენ, დღეს გამოდის და თბილისის მერობის ოფიციალური კანდიდატია. ნუ, ამას მოხერხება სჭირდებოდა და ეს მხოლოდ უსუსურ ქართულ ოცნებას შეეძლო მოეხერხებინა", — აცხადებს გახარია.

თუმცა პრესსამსახურის მიერ გავრცელებულ კომენტარში არ ჩანს, გახარიას აზრით, კონკრეტულად რა უნდა გაეკეთებინა ქართულ ოცნებას, რომ ნიკა მელია კანდიდატი არ ყოფილიყო.

შეგახსენებთ, რომ გავრილოვის ღამის შემდეგ რუსთაველის გამზირზე აქციები რამდენიმე თვის განმავლობაში მიმდინარეობდა და მთავარი მოთხოვნა გახარიას გადადგომა იყო. დაიწერა სიმღერაც სახელწოდებით "გახარიას უხარია". გარდა ამისა, აქტივისტებმა პარლამენტთან დადგეს გახარიას ბიუსტიც, რომელიც ღილაკზე თითის დაჭერისას ბოდიშს იხდიდა. ბანერებისა და პლაკატების უმრავლესობაზე ან გახარიას სახე იყო გამოსახული, ან მისი გადადგომის მოთხოვნა ეწერა.

ნიკა მელია თბილისის მერობის კანდიდატია. ცნობილია, რომ მას მხარს უჭერს ოპოზიციის ნაწილიც. კერძოდ, ევროპული საქართველო, დროა და გირჩი — მეტი თავისუფლება. ამასთან, საკრებულოს თავმჯდომარეობის კანდიდატი ელენე ხოშტარიაა, ხოლო ვიცე-მერობის — გირჩის წარმომადგენელი. ცნობილია ისიც, რომ ენმ თბილისში მაჟორიტარობის კანდიდატებს საერთოდ არ დააყენებს, ხოლო მინიმუმ სამი ადგილი ექნება გირჩს. ამასთან დაკავშირებით ოპოზიციაში მოლაპარაკებები გრძელდება. ამ დროისთვის უცნობია ლელოს პოზიცია, სტრატეგია აღმაშენებელი კი "მესამე ძალაზე" საუბრობს და თბილისში საკუთარი კანდიდატი ეყოლება. რაც შეეხება ქართულ ოცნებას, უკვე ცნობილია, რომ თბილისის მერობა მეორედ სურს კახა კალაძეს.