დეპუტატი თინა ბოკუჩავა, რომელმაც შალვა პაპუაშვილის წინააღმდეგ პარლამენტის ეთიკის საბჭოში საჩივარი შეიტანა, ამბობს, რომ აზრი არ აქვს გენდერული თანასწორობის საბჭოსთვის მიმართვას. მისი თქმით, საბჭოს თავმჯდომარე, ნინო წილოსანი თავად ახალისებს ქალთა მიმართ ძალადობას.

"გენდერული საბჭოსთვის მიმართვა, სიმართლე გითხრათ, უკვე ფიქრობ, რომ სრული აბსურდია. იმიტომ, რომ ქ-ნი წილოსანი პირდაპირ ახალისებს ქალთა მიმართ ძალადობას [...]

ქ-ონ წილოსანს, რომელიც გენდერული თანასწორობის საბჭოს თავმჯდომარეა, ის მინიმალური სენსიტიურობა არ გააჩნია, რომ საკუთარი განცხადებებით არ წაახალისოს პოტენციური მოძალადეები", — განაცხადა თინა ბოკუჩავამ TV პირველის ეთერში.

გუშინ, 21 ივლისს, პარლამენტის ეთიკის საბჭოს ბოკუჩავასთან ერთად მისმა თანაპარტიელმა ნონა მამულაშვილმაც მიმართა. თავად ბოკუჩავამ განაცხადა, რომ გარდა შიდასაპარლამენტო მექანიზმებისა, განიხილავს სამართლებრივ ბრძოლასაც. სწორედ სამართლებრივ სარჩელს ამზადებს ბოკუჩავასა და მამულაშვილის თანაპარტიელი, ანა წითლიძე ქართული ოცნების კიდევ ერთი დეპუტატის, ლევან მგალობლიშვილის წინააღმდეგ.

18 ივლისს, ქართული ოცნების დეპუტატმა, შალვა პაპუაშვილმა კოლეგა, ნაციონალური მოძრაობის დეპუტატი თინა ბოკუჩავა ფიზიკური ძალის გამოყენებით გაიყვანა პარლამენტის თავმჯდომარის ტრიბუნიდან. როგორც ბოკუჩავა ამბობს, პირველად ამის მცდელობა ქართული ოცნების კიდევ ერთ დეპუტატს, ლევან მგალობლიშვილს, რომელსაც შემდეგ პაპუაშვილი შეუერთდა.

19 ივლისს, მომხდარს ნინო წილოსანი გამოეხმაურა. მან სოციალურ ქსელში დაწერა, რომ "პარლამენტის წევრებს შორის ფიზიკური დაპირისპირება, მათ შორის ქალების მონაწილეობით, ძალიან მძიმე საყურებელია", თუმცა მომხდარს პროვოკაცია უწოდა და განაცხადა, რომ სულ მისი ქალი კოლეგები "არ ერთვებოდნენ ამ დესტრუქციულ პროცესში".

თავად პაპუაშვილი ამ ფაქტს ძალადობად არ მიიჩნევს. "დაბრალებებს არ ვიყოთ" — დაწერა მან სოციალურ ქსელში. უფრო მეტიც, 22 ივლისს, ბიუროს სხდომაზე მან განაცხადა, რომ "აგრესორი" თინა ბოკუჩავა იყო და ამიტომ, მას "მოუწია" მანდატურის ფუნქციის შესრულება.

გაიგე მეტი: