შინაგან საქმეთა მინისტრი, გიორგი მღებრიშვილი, კორცხელში მომხდარ ინციდენტს დღეს პირველად გამოეხმაურა და განმარტა, რომ უახლოეს საათებში, შსს სასამართლოს მიმართავს იმისთვის, რომ მან განჩინება იმ პირების დასაკავებლად გასცეს, რომლებიც უკვე იდენტიფიცირებულები არიან.

მღებრიშვილის განცხადებით, გამოძიება სისხლის სამართლის კოდექსის 125-ე მუხლით (ცემა) მიმდინარეობს, თუმცა მისი თქმით შეიძლება ეს მუხლი გადაკვალიფიცირდეს:

"პირადად ვგმობ და ვემიჯნები ყველანაირ ძალადობას. ჩემთვის მიუღებელია, ვისი მხრიდანაც არ უნდა მოდიოდეს ეს. აქვე გეტყვით, რომ ის ემოციები, რაც საზოგადოებაში, ჟურნალისტებში არსებობს, ჩემთვის აბსოლუტურად გასაგებია, მაგრამ გამოძიება ემოციებზე ვერ იქნება აწყობილი".

მღებრიშვილმა ასევე მოუწოდა მონაწილე მხარეებს, არ შემოიფარგლონ მხოლოდ და მხოლოდ სატელევიზიო განცხადებებით და ითანამშრომლონ გამოძიებასთან იმისთვის, რომ მომხდარი სამართლებრივად დროულად შეფასდეს.