19 ივლისის ვაჭრობის შედეგად, ლარი როგორც დოლართან, ასევე ევროსთან მიმართებით კვლავ გამყარდა.

დღეს დადგენილი კურსის მიხედვით, ერთი დოლარის ღირებულება 3,1076 ლარი გახდა, რაც, აქამდე მოქმედ კურსთან შედარებით, 1,45 თეთრით გამყარებას ნიშნავს.

რაც შეეხება ევროს, ამ ვალუტასთან მიმართებით ლარი 2,58 თეთრით გამყარდა და ერთი ევრო 3,6592 ლარს გაუტოლდა. აღსანიშნავია, რომ ეროვნული ვალუტა ევროსთან მიმართებით ამაზე მეტად გამყარებული ბოლოს 2020 წლის სექტემბერში იყო.

შეგახსენებთ, რომ ლარის კურსის მერყეობის შესამცირებლად, საქართველოს ეროვნულმა ბანკმა მიმდინარე წელს 7 სავალუტო ინტერვენცია განახორციელა და ჯამურად 242,9 მლნ დოლარი გაყიდა. მათ შორის, ბოლო სავალუტო აუქციონი 22 აპრილს შედგა, სადაც ეროვნულმა ბანკმა 30 მილიონი დოლარი გაყიდა.

სებ-ის მიერ დღეს დადგენილი გაცვლითი კურსი ხვალ, 20 ივლისს შევა ძალაში.