საქართველოს პრეზიდენტმა ე.წ. სააკაშვილის ზღვიდან შემოპარვის საქმეზე საზღვრის უკანონო ბრალდებით დაკავებული უკრაინელი მეზღვაურები შეიწყალა. ინფორმაცია On.ge-ს მეზღვაურების ადვოკატმა, ბექა ბასილაიამ დაუდასტურა.

გათავისუფლებულია ექსპრეზიდენტის, მიხეილ სააკაშვილის ყოფილი დაცვის წევრი, მიხეილ ბატურინიც. ბასილაიას განცხადებით, 15 ივლისს, განაჩენის დადგომიდან მეორე დღეს, უკრაინელ მეზღვაურებს შეწყალების თხოვნის დაწერა შესთავაზეს, რაზეც მათ უარი განაცხადეს. მისივე თქმით, ეს არ შეუთავაზებიათ საქართველოს მოქალაქისთვის.

"უკრაინის მოქალაქეებმა უთხრეს, არა, ჩვენ დანაშაული არ ჩაგვიდენია არანაირი, კანონი არ დაგვირღვევია, ამიტომ შეწყალებას არ ვითხოვთ. ამავდროულად, ასეთ ამორალურ შემოთავაზებას, რომ თქვენ ორს გაგათავისუფლებთ და საქართველოს მოქალაქეს ციხეში ჩავტოვებთ, საერთოდ, როგორ აძლევთ თავს უფლებას, რომ ასეთი რამ შემოგვთავაზოთ. ამის შემდეგ, იყო სიტუაცია, როდესაც უკვე უკრაინის პრეზიდენტის ვიზიტი საფრთხის ქვეშ დადგა საქართველში და დღეს ვხედავთ, რომ სამივე გაათავისუფლეს, შესაბამისად, ცხადია, ამათი დაჭერაც პოლიტიკური გადაწყვეტილება იყო და გათავისუფლებაც პოლიტიკური გადაწყვეტლება", — აცხადებს ის.

ადვოკატის განცხადებით, მათ ბრალი სისხლის სამართლის კოდექსის 344-ე მუხლის მე-2 ნაწილის "ა" ქვეპუნქტით ედებოდათ, რაც ჯგუფურად საქართველოს სახელმწიფო საზღვრის უკანონოდ გადაკვეთას გულისხმობს.

საქართველოს პრეზიდენტის ადმინისტრაციის ცნობით, პრეზიდენტმა შეწყალების აქტი 17 ივლისს გამოსცა, რომელიც ძალაში 19 ივლისს შევიდა. მათივე განცხადებით, ეს ორ პრეზიდენტს შორის იმ შეთანხმების შესრულებაა, რომელიც კიევში ოფიციალური ვიზიტისას შედგა.