ქართული ოცნების ერთ-ერთი ლიდერის, ირაკლი კობახიძის განცხადებით, ევროპული საბჭოს პრეზიდენტს, შარლ მიშელს მიაწვდის ინფორმაციას, როგორ "ზედმიწევნით" ასრულებს ქურთული ოცნება მიშელის დოკუმენტს და როგორ არ ასრულებს მას ოპოზიცია. ამის შესახებ მან ტელეკომპანია იმედის ეთერში ისაუბრა.

"ჩვენ, რა თქმა უნდა, სრულ ინფორმაციას მივაწვდით მიშელს იმასთან დაკავშირებით, თუ როგორ სრულდება ჩვენი მხრიდან დოკუმენტი, თითოეული პუნქტი ზედმიწევნით და ასევე, ბუნებრივია მივაწვდით ინფორმაციას იმასთან დაკავშირებით, თუ როგორ არ ასრულებს ოპოზიცია ამ შეთანხმებას, სხვადასხვა ფორმით.

ერთი ეს არის, რომ ოპოზიციონერი დეპუტატების ნახევარზე მეტს დღემდე არ აქვს ხელი მოწერილი მიშელის დოკუმენტზე. გარდა ამისა, მუდმივად ხდება საკითხებზე ხმის არმიცემა, რომელიც არის ფუნდამენტური საარჩევნო რეფორმა, სხვა საკითხები — არაერთი კენჭისყრა გვქონდა, რაშიც არ მიიღეს მონაწილეობა ოპოზიციის წარმომადგენლებმა, მათ შორის იმათ, ვინც ხელი მოაწერა მიშელის შეთანხმებას", — განაცხადა მან.

19 ივლისს საქართველოს საერთაშორისო კონფერენციის ფარგლებში ევროპული საბჭოს პრეზიდენტი, შარლ მიშელი ეწვევა. საქართველოში მიმდინარე პროცესების ფონზე, აშშ-ს სახელმწიფო დეპარტამენტმა უზენაესი სასამართლოს მოსამართლეების არჩევასთან დაკავშირებით კრიტიკული განცხადება გაავრცელა და ღრმა შეშფოთება გამოთქვა. მათი თქმით, ეს ეწინააღმდეგება მმართველ და ოპოზიციურ პარტიებს შორის დადებულ 19 აპრილის შეთახმებას.