სადაზღვევო კომპანია ჯიპიაი ჰოლდინგი ემიჯნება ძალადობას და მთავრობისგან მოითხოვს, 5-6 ივლისის კონტრაქციის ძალადობრივ მოვლენებზე ადეკვატური რეაგირება მოახდინოს — "დაგვარწმუნოს, რომ კანონის აღსრულება არის ხელისუფლების და არა საზოგადოების ცალკეული ჯგუფების ხელში".

"ჩვენი ქვეყანა დგას პატიოსანი შრომით და აქედან გადახდილი გადასახადების გადამხდელ მოსახლეობაზე, რომელთათვის მიუღებელია უკანონობა და ადამიანის უფლებების შელახვა [...] ჩვენი ხმა მნიშვნელოვანი უნდა იყოს და ამიტომაც კიდევ უფრო მეტი პასუხისმგებლობა გვაქვს, არ გავჩუმდეთ და მკაფიოდ გავემიჯნოთ ძალადობას და მოვითხოვოთ მთავრობისგან, მოახდინოს ადეკვატური რეაგირება", — ვკითხულობთ კომპანიის მიერ გავრცელებულ განცხადებაში.

ჯიპიაი ჰოლდინგში აცხადებენ, რომ ისინი არა მხოლოდ მატერიალურ დოვლათს ქმნიან, არამედ ცდილობენ დაამკვიდრონ ისეთი ღირებულებები, თავისუფლება, სამართლიანობა, კეთილსინდისიერება, მრავალფეროვნება, ურთიერთპატივისცემა და ა.შ. სწორედ ამიტომ, აცხადებენ, რომ არ აქვთ უფლება გაჩუმდნენ ძალადობრივი კონტრაქციისას ჟურნალისტებსა და სამოქალაქო აქტივისტებზე თავდასხმის ფაქტების შემდეგ.

"გვჯერა, რომ ჩვენნაირად განიცდის და ფიქრობს ყველა ის ადამიანი, ვინც თავისი შრომით ქმნის დოვლათს და იმედი გვაქვს, შემოგვიერთდებიან ამ მოწოდებაში", — აცხადებენ კომპანიაში.

GPI-ში მიიჩნევენ, რომ მნიშვნელოვანია ამ საკითხთან დაკავშირებით ყველა კომპანიებმა და ინდივიდმა მკაფიოდ და საჯაროდ გამოხატოს თავისი პოზიცია.