დაავადებათა კონტროლისა და საზოგადოებრივი ჯანდაცვის ეროვნული ცენტრის დირექტორის, ამირან გამყრელიძის თქმით, ყველაფერი გააკეთეს, რომ ვაქცინის სარეგისტრაციო პორტალმა, booking.gov.ge-მ გამართულად იმუშაოს.

"წარსულის გამოცდილებიდან, ყველაფერი გააკეთეს IT სამსახურებმა, რომ პორტალმა იმუშაოს გამართულად. დღეს ჩვენი, დაავადებათა ცენტრის პორტალები განთავსებულია ყველაზე უფრო უსაფრთხო სერვერებზე ქვეყანაში და დარწმუნებული ვარ, რომ მან უნდა იმუშაოს ჩვეულებრივად", — განაცხადა ამირან გამყრელიძემ.

დღეს, 14 ივლისს, 15:00 საათზე სარეგისტრაციო პორტალი Pfizer-ის მსურველი მოქალაქეებისთვის გაიხსნება, ვაქცინაცია კი 16 ივლისიდან იქნება შესაძლებელი. Pfizer-ის 28 000 დოზა ქვეყანაში გუშინ, გვიან ღამით ჩამოვიდა.

3 ივლისს, Sinopham-სა და Sinovac-ზე რეგისტრაციის დაწყება ვერ მოხერხდა. ჯანდაცვის მინისტრის მოადგილემ, თამარ გაბუნიამ განაცხადა, რომ ვაქცინაციაზე რეგისტრაციის პორტალზე მასირებული კიბერშეტევა მიმდინარეობდა. აღნიშნულ ფაქტზე შსს-მ გამოძიება სსსკ-ს 285-ე და 286-ე მუხლებით დაიწყო, რაც კომპიუტერული მონაცემის, ანდა კომპიუტერული სისტემის უკანონოდ გამოყენებასა და ხელყოფას გულისხმობს. ვაქცინაციის სარეგისტრაციო პორტალი მეორე დღეს აღდგა.

6 ივლისს, საკოორდინაციო საბჭოს სხდომაზე გადაწყდა, რომ აცრის დაჯავშნა კლინიკაში დარეკვითაც იქნებოდა შესაძლებელი.