აშშ-ის პრეზიდენტმა, დონალდ ტრამპმა ახალ ბრძანებას მოაწერა ხელი, რომელიც ექვსი მუსლიმური ქვეყნის მოქალაქეებს შტატებში მოგზაურობას უკრძალავს. ახალი ბრძანების მიხედვით ძველი შეზღუდვა აღარ შეეხება ერაყს.

ტრამპის 6 კვირის წინანდელ ორიგინალურ ბრძანებას მთელი ქვეყნის მასშტაბით აეროპორტებში ქაოსი მოჰყვა, რის გამოც ფედერალურმა სასამართლოებმა ის დაბლოკეს.

CNN-ის ცნობით, ახალი ბრძანების მიხედვით მოქალაქეები სირიიდან, ირანიდან, ლიბიიდან, სომალიდან, სუდანიდან და იემენიდან სულ მცირე 90 დღის განმავლობაში ვერ მიიღებენ ვიზას. ასევე, შეიზღუდება ლტოლვილების მიღება 120 დღით და შესაბამის პირებს დაევალებათ ლტოლვილთა მიღების პროგრამის გაუმჯობესება.

ტრამპმა ბრძანებას ხელი ორშაბათს, ოვალურ ოფისში, რეპორტიორებისა და კამერების გარეშე მოაწერა.

სახელმწიფო მდივანი რექს ტილერსონი თქვა, რომ ერაყის ამოღება სიიდან ერაყის ხელისუფლებასთან ინტენსიური მოლაპარაკებებისა და სახელმწიფო დეპარტამენტის აქტიური ჩართულობის შედეგად მოხდა. ამასთან ტილერსონმა არ დააკონკრეტა, როგორ გაუმჯობესდა სირიის მოქალაქეების შემოწმება.

ახალი ბრძანება, რომელიც ძალაში 16 მარტს შედის, ასევე, მკაფიოდ ათავისუფლებს ამ ექვსი ქვეყნის იმ მოქალაქეებს, რომლებიც აშშ-ის ლეგალური მუდმივი მაცხოვრებლები არიან, ან აქვთ მოქმედი ვიზა - მათ შორის მათ, ვისაც წინა ბრძანებამ ვიზა გაუუქმა.

ჩვენ არ შეგვიძლია დავუშვათ, რომ აშშ-ის უსაფრთხოებას საფრთხე დაემუქროს ვიზიტორების ქვეყანაში შემოსვლით, როდესაც მათ მთავრობებს არ აქვთ სურვილი და შესაძლებლობა მოგვაწოდონ კონტროლისთვის საჭირო ინფორმაცია, ან ეს მთავრობები ტერორიზმის აქტიური მხარდამჭერნი არიან," - განაცხადა მთავარმა პროკურორმა, ჯეფ სეშენსმა.

ახალი ბრძანების თანახმად, თავშესაფრის მინიჭების განხილვის დროს აღარ მიენიჭება პრიორიტეტი რელიგიურ უმცირესობებს:

ბრძანება არ განიხილება როგორც მუსლიმების შეზღუდვა ... გვინდა დავრწმუნდეთ, რომ ყველას ესმის ეს,"- უთხრა თეთრი სახლის წარმომადგენელმა რეპორტიორებს.