12 აგვისტო შესაძლოა უქმე დღედ გამოცხადდეს. პარლამენტის წევრებმა აკაკი ზოიძემ, ლერი ხაბელოვმა, შოთა ხაბარელმა, კობა კობალაძემ, ლევან კობერიძემ და კარლო კოპალიანმა, საკანონმდებლო ინიციატივით უკვე მიმართეს პარლამენტს.

კანონპროექტის თანახმად, შრომის კოდექსის მე-20 მუხლის პირველი პუნქტით დადგენილ უქმე დღეების ჩამონათვალს ემატება ქვეპუნქტი: 12 - აგვისტო საქართველოს დიდი გამარჯვების დღე.

კანონპროექტის განმარტებით ბარათში ვკითხულობთ, რომ მისი მიღების ძირითადი საფუძველია 1121 წლის 12 აგვისტოს, დიდგორის ბრძოლაში გამარჯვების დღისთვის განსაკუთრებული დატვირთვის მინიჭება: "ეს დღე არის მეფე დავით აღმაშენებლის, როგორც უდიდესი სამხედრო სტრატეგის, მისი საბრძოლო მანევრის შედეგი და ამავე დროს, ეს არის ძლიერი ქართული სახელმწიფოს, ეროვნული სულის გამარჯვების დღე".

კანონპროექტის მიზანია საქართველოს ხელისუფლებამ ევროინტეგრაციის პროცესის პარალელურად, ვიზალიბერალიზაციის მიღების შემდგომ მეტი ძალისხმევა მიმართოს სახელმწიფო გაერთიანებისა და შიდა ეროვნული კონსოლიდაციის კუთხით.