შინაგან საქმეთა სამინისტროს განცახდებით, ქართული ოცნების ოფისთან მიმდინარე აქციაზე 12 პირი დააკავეს. მათ შორის არის ჟურნალისტი ირაკლი აბსანძე და პარტია გირჩის წევრები.

"აქციის მონაწილეები გასცდნენ შეკრების და გამოხატვის თავისუფლების კანონით დასაშვებ ფარგლებს. კიდევ ერთხელ ვაფრთხილებთ აქციის ორგანიზატორებს, უზრუნველყონ, რომ აქციამ არ მიიღოს ძალადობრივი ხასიათი და არ გასცდნენ კანონით დასაშვებ ნორმებს. წინააღმდეგ შემთხვევაში პოლიცია იმოქმედებს კანონის შესაბამისად", — წერია შსს-ს განცხადებაში.

უცნობია, რას ედავებიან კონკრეტულად აბსანძეს. ის ბოლო ორი დღეა აქციებში მონაწილეობს, სადაც 5 ივლისს მომხდარ ძალადობასა და ხელისუფლების უმოქმედობას აპროტესტებენ, ასევე, ითხოვენ პრემიერმინისტრტმა ღარიბაშვილმა აიღოს პოლიტიკური პასუხისმგებლობა.

ქართული ოცნების ოფისთან დაპირისპირება, მას შემდეგ დაიწყო, რაც აქიტივსტებმა "ოცნების" შენობას კვერცხები ესროლეს და სტენსილების გაკეთბა სცადეს. ადგილზე მყოფი On.ge-ს ჟურნალისტების თქმით, პოლიცია მედიასა და აქტივისტებს მიაწვა და ტერიტორია ასე გაათავისუფლა.

პარლამენტიდან ქართული ოცების ოფისთან აქციამ მას შემდეგ გადაინაცვლა, რაც შინაგან საქმეთა სამინისტრომ ბრიფინგი გამართა 5 ივლისს ნაცემი ოპერატორის საქმეზე. უწყება შუალედურ ექსპერტიზაზე დაყრდნობით ამტკიცებს, რომ ლექსო ლაშქარავა შესაძლოა ზედოზირებით გარდაიცვალა.