თბილისის საქალაქო სასამართლოს მოსამართლემ, რომან ხორავამ ძალადობრივი კონტრაქციის მონაწილეებს, რომლებსაც ბრალი ედებათ მთავარი არხისა და TV პირველის ჟურნალისტებზე ძალადობა, სასამართლო სხდომაზე მიმართა და უთხრა, რომ იქ ქმედებები, რასაც მათ ედავებიან, დანაშაული და სიბნელეა. ხორავამ ოთხივე ბრალდებულს აღკვეთის ღონისძიების სახით პატიმრობა შეუფარდა და თქვა, რომ შეუძლებელია სხვა ღონისძიების გამოყენება. მისი თქმით, ამ გადაწყვეტილებას საქართველოს სახელით იღებს.

"მთელი საქართველო ადევნებდა თვალყურს, რა ხდებოდა. ის ქმედებები, რაც თქვენ წარგედგინათ, გარდა იმისა, რომ დანაშაულია, არღვევს სახელმწიფოს სტაბილურობას, წარმოადგენს სრულ სიბნელეს, ამავე დროს, სირცხვილია და უაზრობა. ეს არის შეფასება იმ ქმედებების, რაც იმ დღეს ხდებოდა.

მე გადაწყვეტილებას ვიღებ საქართველოს სახელით, აი, გერბი და დროშა, და გეუბნებით თქვენ, რომ თქვენი ქმედებები არის უაღრესად საფრთხის შემცველი და დასაბუთებული ვარაუდის სტანდარტით, ძალიან მაღალი საფრთხე და რისკი არსებობს ახალი დანაშაულის ჩადენის, ასევე, გამოძიებისათვის ხელის შეშლის და მიმალვის. ამ ეტაპზე შეუძლებელია სხვა აღკვეთის ღონისძიების გამოყენება, გარდა პატიმრობისა. ამიტომ სრულად ვეთანხმები ბრლადების მხარეს", — თქვა ხორავამ.

TV პირველისა და მთავარი არხის ჟურნალისტებზე თავდასხმისთვის გამო 5 ივლისს გამართული ძალადობრივი კონტრაქციის 4 მონაწილეს — აკაკი ნაკაშიძეს, თემურ ხარაულს, თორნიკე დავლაშელიძესა და ილია ქებაძეს სასამართლომ პატიმრობა შეუფარდა. სასამართლო სხდომაზე პროკურატურა აღკვეთის ღონისძიების სახით პატიმრობას ითხოვდა, ხოლო დაცვის მხარე — გირაოს. ბრალდებულები თავს უდანაშულოდ მიიჩნევენ.

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.

6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანა და მოძალადე ჯგუფები რუსთაველზე შეუშვა. მათ მეორედ ჩამოგლიჯეს და დაწვეს ევროკავშირის დროშა.

ამ ძალადობრივი მოვლენების გამო სამოქალაქო საზოგადოებისა და ოპოზიციის ნაწილს მიაჩნია, რომ შინაგან საქმეთა მინისტრის პასუხისმგებლობის საკითხი უნდა დადგეს, რადგან მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.