შინაგან საქმეთა მინისტრის მოადგილე, ალექსანდრე დარახველიძე აცხადებს, რომ 5 ივლისს, ხეთაგუროვის ქუჩაზე ტურისტის დაჭრის ფაქტი არ უკავშირდება თბილისი პრაიდთან.

"აღნიშნული ფაქტი მოხდა სრულიად დამოუკიდებლად, ეს მოხდა ხეთაგუროვის ქუჩაზე, სადაც, როგორც ჩვენთვის ცნობილია და [ბრალდებულის] დედამაც გააკეთა განცხადება, ფსიქიურად დაავადებული ადამიანი თავს დაესხა უცხოელ ტურისტს. არანაირი კავშირი ამ ფაქტს იმ ფაქტებთან, რაზეც საუბარი იყო, რომ თითქოს ეს პრაიდს უკავშირდება [არ აქვს], სიცრუეა. ეს იყო ჩვეულებრივი შემთხვევა, როდესაც მოხდა საყოფაცხოვრებო ნიადაგზე, არანაირ დაპირისპირებას ადგილი არ ჰქონია იქ. მიეჭრა კონკრეტული პირი და მოახდინა სულ სხვა ადგილას მისი ჯანმრთელობის დაზიანება. ჩვენ დაწყებული გვაქვს გამოძიება, დაკავებულია ეს პირი, ჩატარდება შესაბამისი ექსპერტიზა და გვეცოდინება საბოლოო პასუხი", — განაცხადა ალექსანდრე დარახველიძემ.

აღნიშნულ ფაქტზე დაკავებულს დღეს, 7 ივლისს, აღკვეთის ღონისძიების სახით პატიმრობა შეეფარდა. უცხო ქვეყნის მოქალაქე ხეთაგუროვის ქუჩაზე 5 ივლისს დაჭრეს.