ინტერპრესნიუსის (IPN) ინფორმაციით, ჰომოფობიური და ძალადობრივი აქციის მონაწილეებმა ფოტორეპორტიორს, გიორგი ნიკოლიშვილს ფიზიკურად გაუსწორდნენ. იგი ალადაშვილის კლინიკაშია გადაყვანილი.

IPN-ში აცხადებენ, რომ ფოტორეპორტიორს ქაშუეთის ეკლესიის მიმდებარე ტერიტორიაზე რამდენიმე პირი დაესხა თავს. დაზიანებულია რეპორტიორის ტექნიკაც.

ძალადობრივი ჯგუფების მიერ ორგანიზებული აქციის მონაწილეები დილიდან ფიზიკურად უსწორდებიან მედიის წარმომადგენლებს. მათ სცემეს, ტექნიკა დაუზიანეს და პროფესიულ საქმიანობაში ხელი შეუშალეს ფორმულას, TV პირველის, მთავარი არხის, რადიო თავისუფლებისა და სხვა მედიების ჟურნალისტებსა და ოპერატორებს. ჰომოფობიური და ძალადობრივი კონტრაქციის მონაწილეები On.ge-ს ჟურნალისტსაც დაუპირისპირდნენ.

ჟურნალისტებზე ძალადობის ფაქტებზე პასუხისმგებლობის აღებას არ აპირებს საპატრიარქო, რომელმაც Tbilisi Prideს-ს წინააღმდეგ აქცია დაგეგმა.

სახალხო დამცველმა, ნინო ლომჯარიამ ჟურნალისტების მუშაობას სამოქალაქო გმირობა უწოდა, მისი თქმით, ჟურნალისტების მუშაობამ "პრევენცია გაუკეთა უარესი მოვლენების განვითარებას".

გაიგე მეტი: