შინაგან საქმეთა სამინისტროს პოლიციის თანამშრომლებმა საბრძოლო მასალის ან ფეთქებადი ნივთიერების მართლსაწინააღმდეგო შეძენა-შენახვის ბრალდებით ერთი პირი დააკავეს. უწყების პრესსამსახურის ინფორმაციით, დაკავების ოპერაციაში კახეთის პოლიციის დეპარტამენტის თელავის რაიონული სამმართველოს თანამშრომლები მონაწილეობდნენ.

"სამართალდამცველებმა თელავის რაიონის სოფელ ლაფანყურში, დაკავებულის საცხოვრებელი სახლის ჩხრეკისას, 6 კილოგრამი ფეთქებადი ნივთიერება ამონიუმი, სხვადასხვა ტიპის ცეცხლსასროლი იარაღისთვის განკუთვნილი 46 საბრძოლო ვაზნა და ცეცხლსასროლი იარაღის დაშლილი დეტალები ამოიღეს,"- აღნიშნულია შსს-ს განცხადებაში.

შსს ექსპერტიზის დასკვნაზე დაყრდნობით აღნიშნავს, რომ ამოღებული ფეთქებადი ნივთიერება და საბრძოლო მასალა ვარგისია.

გამოძიება საბრძოლო მასალის ან ფეთქებადი ნივთიერების მართლსაწინააღმდეგო შეძენა-შენახვის ფაქტზე სისხლის სამართლის კოდექსის 236 მუხლის მეორე ნაწილით მიმდინარეობს.