NATO-ს გენერალური მდივნის სპეციალური წარმომადგენელი სამხრეთ კავკასიასა და ცენტრალურ აზიაში ჯეიმს აპატურაის თქმით, საერთაშორისო საზოგადოება საქართველოში მიმდინარე პოლიტიკურ პროცესებს ყურადღებით აკვირდება. აპატურაიმ საქართველოს პარლამენტში სტუმრობისას, ასევე, განაცხადა, რომ საქართველოში პოლიტიკური პროცესები მუშაობს.

"მიხარია, რომ აქ ვიმყოფები განსაკუთრებით პარლამენტში, რადგან საქართველოში პოლიტიკურ სიტუაციას საერთაროშისო საზოგადოება და ეუთო ძალიან დიდი ყურადღებით აკვირდება. NATO-ს წევრი ქვეყნები ძალიან აქტიურები არიან, აშშ-ის ელჩი აქ იმყოფება. ძალიან მოხარული ვართ, რომ ევროკავშირის მედიატორობით ინიცირებული რეფორმები ხორციელდება, პოლიტიკური პარტიების უმრავლესობამ ევროკავშირის დახმარებით შედგენილ დოკუმენტს ხელი მოაწერა. კარგია, რომ სასამართლო რეფორმის განხორციელებაში პროგრესს ვხედავთ", — განაცხადა ჯეიმს აპატურაიმ.

NATO-ს გენერალური მდივნის სპეციალური წარმომადგენელი სამხრეთ კავკასიასა და ცენტრალურ აზიაში, ჯეიმს აპატურაი ამჟამად თბილისში იმყოფება და ოფიციალურ შეხვედრებს მართავს.