27 წლის კატალუნა ენრიკესი, რომელიც ცოტა ხნის წინ მის ნევადა 2021 გახდა, მის ამერიკის ტიტულისთვის იბრძოლებს. კატალუნა კონკურსის ისტორიაში პირველი ღიად ტრანსგენდერი ქალი იქნება.

კატალუნა, რომელმაც მის ნევადას კონკურსში 21 მონაწილე დაამარცხა, საკუთარ სოციალურ ქსელებს ტრანსგენდერი ადამიანების უფლებებისა და მენტალური ჯანმრთელობის შესახებ ცნობიერების ამაღლების კუთხით იყენებს. აღსანიშნავია, რომ მან კონკურსში გამარჯვებისთვის მადლობა ლგბტ+ საზოგადოებას გადაუხადა.

"დიდი მადლობა ყველას, ვინც პირველივე დღიდან მხარს მიჭერდა. ჩემი თემი ყოველთვის ჩემს გულშია. ჩემი გამარჯვება ჩვენი გამარჯვებაა. ჩვენ ახლახან ისტორია შევცვალეთ", — წერს კატალუნა საკუთარ ინსტაგრამ პოსტში.

"ჩემი ცხოვრების გზა მარტივი არ ყოფილა. ფიზიკური და სექსუალური ძალადობის მსხვერპლი ვიყავი. მენტალური ჯანმრთელობის პრობლემებსაც ვებრძოდი. როცა ვიზრდებოდი, ბევრი არაფერი მქონდა, არც მხარდაჭერა მქონდა. ამის მიუხედავად, მაინც შევძელი, მიმეღწია წარმატებას, გადავრჩენილიყავი და სხვებისთვის გზა გამეკვალა", — ამბობს კატალუნა ერთ-ერთ ინტერვიუში.

აღსანიშნავია, რომ კატალუნას გამარჯვება მის ნევადას ოფიციალურ ინსტაგრამზეც მიულოცეს.