TV პირველის ჟურნალისტსა და ოპერატორს წალკაში, სოფელ წინწყაროში, გადაღების დროს თავს დაესხნენ და ფიზიკურად გაუსწორდნენ, დამტვრეულია აპარატურა. ჟურნალისტის ინფორმაციით, თავდასხმაში გამგებლის ბიძაც მონაწილეობდა. თავდასხმის დეტალების შესახებ ინფორმაციას TV პირველი ავრცელებს.

როგორც არხის საინფორმაციო სამსახურის ხელმძღვანელმა, ნოდარ მელაძემ On.ge-ს უთხრა, ჯგუფი წინწყაროში ადგილობრივების თხოვნით იყო ჩასული. მოსახლეობა ადგილზე არაფორმალური მმართველობის პრობლემასა და მიწების მიტაცების საკითხზე საუბრობს. მათი თქმით, ვითარებას ადგილზე გამგებელი აფრასიძე და მისი ნათესავები აკონტროლებენ.

ჟურნალისტი ნინო ელიკაშვილის თქმით, ქუჩაში მოსახლეობის ჩაწერისას დაესხნენ თავს და თავდასხმის რამდენიმე ეპიზოდი იყო, რა დროსაც მათ აპარატურა დაუზიანეს და შეურაცხყოფა მიაყენეს. განსაკუთრებული აგრესიულობით გამგებლის ბიძა, გოჩა აფრასიძე, გამოირჩეოდა. ამასთან, როგორც ელიკაშვილი ამბობს, მომხდარს თავად გამგებელიც შეესწრო, მაგრამ მას ბიზისთვის არათუ ხელი არ შეუშლია, არამედ გაამართლა კიდეც.

TV პირველის მიერ გადაღებულ კადრებში პირდაპირ ჩანს და ისმის, როგორ აყენებს ის ჟურნალისტებს ფიზიკურ შეურაცხყოფას, როგორ აგინებს და როგორ უშლის ხელს ჟურნალისტური საქმიანობის შესრულებაში.

"გასწიე, გითხარი! გასწიე! ერთხელ ვერ გაიგონე? TV პირველს ვერ ვიტან, თქვენს დედებს *** თქვე ბოზებო, დაახვიეთ აქედან... გაიკეთე***, ბლიად. თქვენს დედებს*** მე, ბიჭო... პოლიციას მივმართავ (ჟურნალისტი)... მიმართე, შენი დედიკო *** ნუ მიღებ თორემ ამ კბილებს ამოგიღებ", — ისმის ჩანაწერში.

ამის შემდეგ კი გოჩა აფრასიძე თანასოფლელებს დაუპირისპირდა, რადგან ისინი ჟურნალისტების დაცვას ცდილობდნენ. აფრასიძე მათაც ემუქრება და აგინებს.

ამასთან, კადრებში ჩანს, რომ კიდევ ერთი თავდასხმა უკვე გამგეობის შენობასთან მოხდა, სადაც უკვე გამგებლის დედა დაუპირისპირდა ჟურნალისტებს და შეურაცხყოფას აყენებდა.

მოხდართან დაკავშირებით განცხადებას შსს ავრცელებს, სადაც ნათქვამია, რომ გამოძიება ძალადობის და ჟურნალისტურ საქმიანობაში ხელის შეშლის მუხლებით დაიწყო.

"მიმდინარე წლის 30 ივნისს, წალკის მუნიციპალიტეტის სოფელ წინწყაროში ტელეკომპანია პირველის გადამღები ჯგუფს ფიზიკურად დაუპირისპირდა ადგილობრივი პირი, რომელმაც ჟურნალისტებს პროფესიულ საქმიანობაში შეუშალა ხელი და ფიზიკურად შეურაცხყოფა მიაყენა მათ. შეტყობინების მიღებისთანავე პოლიცია შემთხვევის ადგილზე გამოცხადდა და დაიწყო საგამოძიებო ღონისძიებები", — ნათქვამია ინფორმაციაში.

განცხადებაში ასევე აღნიშნულია, რომ გრძელდება საგამოძიებო ღონისძიებები დანაშაულის ჩამდენი პირის მიმართ შესაბამისი სამართლებრივი პასუხისმგებლობის დაკისრების მიზნით.