საოლქო საარჩევნო კომისიის გადაწყვეტილებით, კორცხელის 53-ე და 54-ე საარჩევნო უბნებზე ხმებს ხელახლა ითვლიან. ხმების დათვლის პროცესი რამდენიმე წუთის წინ დაიწყო. ამის შესახებ ინფორმაციას რუსთავი 2 ავრცელებს.

აღნიშნული გადაწყვეტილების მიღებამდე საარჩევნო დარბაზში ხმაური იყო, რადგან ნაციონალური მოძრაობის ერთ-ერთმა წევრმა საუბნო კომისიის თავჯდომარე ქართული ოცნების მხარდაჭერაში დაადანაშაულა, რამაც ურთიერთშელაპარაკება გამოიწვია და აღნიშნულ პირს, კომისიის გადაწყვეტილებით, დარბაზი დაატოვებინეს.

ქართული ოცნების წევრები მიჩნევენ, რომ კორცხელში, შუალედურ არჩევნებში, მათ გაიმარჯვეს და სურთ, რომ ხმები თავიდან დაითვალონ. ისინი ამბობენ, რომ საარჩევნო უბნის მიმდებარედ ფიზიკური დაპირისპირების გამო კომისიის წევრებმა ხმები არასწორად დაითვალეს.

გუშინ, 22 მაისს, ზუგდიდში, კორცხელის საარჩევნო უბანზე, სადაც შუალედური ადგილობრივი თვითმმართველობის არჩევნები მიმდინარეობდა, ნაციონალური მოძრაობის წევრებს, მათ შორის გიგა ბოკერიასა და ნიკა მელიას, ფიზიკური შეურაცხყოფა მიაყენეს.