პარტია ქართული ოცნების პოლიტიკური საბჭოს წევრმა მამუკა მდინარაძემ ზუგდიდის რაიონის სოფელ კორცხელში, საარჩევნო უბანთან მომხდარ დაპირისპირებაში ნაციონალური მოძრაობის საერთაშორისო მდივანი, გიგა ბოკერია დაადანაშაულა. მდინარაძის თქმით, პროვოკაცია "ბოკერიას ზონდერებმა" მოაწყვეს:

"დღეს კიდევ ერთხელ გამოჩნდა, რომ ნაციონალური მოძრაობა არის გიგა ბოკერიას პარტია და კიდევ ერთხელ გამოჩნდა მისი ხელწერა. ბოკერიას კლანმა გაიმარჯვა მიშას კლანზე და ეს დადასტურდა პარტიიდან ვაშაძის წამოსვლით. ვაშაძე წარმოადგენდა მიშას მხარდამჭერთა ჯგუფს და ნაციონალური მოძრაობის პირველი ათეულითაც გამოჩნდა, რომ ბოკერია იქ არის გადაწყვეტილების ერთადერთი მიმღები. დღეს არჩევნები ტარდებოდა ბევრგან, თუმცა, დაპირისპირება მოხდა მხოლოდ იქ, სადაც იყო ბოკერია და მისი ჯგუფი. ესაა მისი ხელწერა, პროვოკაცია, რაშიც აქვს მას ძალიან დიდი გამოცდილება. მიშას პარტია გადაიქცა ბოკერიას პარტიად თუმცა, სტილი დაცულია. სამწუხაროა, რომ ნაციონალურმა მოძრაობამ კორცხელში მაინც შეძლო პროვოკაციის მოწყობა. გიგა ბოკერიას ზონდერ ჯგუფებმა ფიზიკური შეურაცხყოფა მიაყენეს როგორც ჟურნალისტებს, ისე ადგილობრივ მოსახლეობას".

ხელჩართული ჩხუბი ზუგდიდში, კორცხელის საარჩევნო უბანთან. 22 მაისი, 2016

ფოტო: Livepress

22 მაისს საქართველოს 9 მაჟორიტარულ ოლქში გაიმართა ადგილობრივი თვითმმართველობის არჩევნები. არჩევნების მიმდინარეობისას კორცხელის საარჩევნო უბანთან დაპირისპირება მოხდა, რა დროსაც ცემეს ენმ-ს ლიდერები - გიგა ბოკერია და ნიკა მელია.

ტელეკომპანია რუსთავი 2-ისა და ადგილობრივი მედიასაშუალება ლაივპრესის ინფორმაციით, ჩხუბში მონაწილეობდნენ თბილისიდან ზუგდიდში სპეციალურად ჩაყვანილი სპორტსმენები. რუსთავი 2-თან აღნიშნულმა პირებმა განაცხადეს, რომ ისინი თბილისიდან ტურისტული მიზნით იყვნენ ჩასულები და კორცხელში შემთხვევით შეხვდნენ ქართული ოცნების ახალგაზრდული მოძრაობის წევრს, რომელიც მათი მეგობარია. სპორტსმენების თქმით, მათ პროვოკაცია ნაციონალურმა მოძრაობამ მოუწყო.