ევროპარლამენტმა ამერიკის მოქალაქეებისთვის ევროკავშირში უვიზო მიმოსვლის შეჩერებას მხარი დაუჭირა, თუმცა ეს არ ნიშნავს იმას, რომ ამერიკელებს უკვე დღეიდან სჭირდებათ ვიზის მიღება. საბოლოო გადაწყვეტილება აშშ–ს მოქალაქეებისთვის ვიზის დაწესებაზე ევროკომისიამ უნდა მიიღოს, ევროპარლამენტის მხარდაჭერას კი სარეკომენდაციო ხასიათი აქვს.

ინდეფენდენტის ინფორმაციით, აღნიშნულის განხილვა მას შემდეგ დაიწყო, რაც აშშ არ დასთანხმდა ვიზების გაუქმებას ევროკავშირის 5 ქვეყანასთან - ბულგარეთთან, ხორვატიასთან, კვიპროსთან, პოლონეთთან და რუმინეთთან. ამერიკის მოქალაქეებს კი უპრობლემოდ შეეძლოთ ევროკავშირის ქვეყნებში მოგზაურობა.

ევროპარლამენტი თავისი გადაწყვეტილებით ევროკომისიას მოუწოდებს, გააუქმოს უვიზო რეჟიმი 2 თვის განმავლობაში. ანუ მას შემდეგ, რაც ევროკომისია ცვლილებას განახორციელებს, ამერიკის მოქალაქეებს, ევროპაში სამოგზაუროდ, 12 თვის განმავლობაში დამატებითი დოკუმენტების მომზადება და ვიზის მიღება მოუწევთ.

კომისიამ 3 წლის წინ აღმოაჩინა, რომ ამერიკის შეერთებული შტატები ორმხირივი შეთანხმების თავის წილ ვალდებულებებს არ ასრულებდა, თუმცა აქამდე არაფერი მოუმოქმედებია. ახლა კი ევროკომისიას ორი თვე აქვს მოქმედებისთვის, წინააღმდეგ შემთხვევაში კი ევროდეპუტატები ევროსასამართლოს მიმართავენ.

ნიუსის თავდაპირველი სათაური იყო ასეთი: "ევროპარლამენტმა ამერიკელებისთვის უვიზო მიმოსვლა შეაჩერა", რაც იყო არასწორი ინტერპრეტაცია. On.ge ბოდიშს უხდის მკითხველს დაშვებული შეცდომისთვის.