ქართული ოცნებისა და საპარლამენტო ოპოზიციის დეპუტატები კონსტიტუციის გარდამავალ დებულებებში ცვლილებების ძირითად პრინციპებზე შეთანხმდნენ. საქმე ეხება საარჩევნო ბარიერს, ფრაქციაში დეპუტატთა მინიმალურ რაოდენობასა და გენერალური პროკურორის არჩევის წესს. მმართველი პარტიის თავმჯდომარემ, ირაკლი კობახიძემ განაცხადა, რომ ჩამოთვლილ საკითხებზე არსებობს სრული კონსენსუსი.

"პირველი, რაც შეეხება საარჩევნო ბარიერს, დაინიცირდება პროექტი 2%-იან ბარიერთან დაკავშირებით და უზრუნველყოფილი იქნება პროპორციული არჩევნების ჩატარება 2%-იანი ბარიერით უკვე შემდეგი საპარლამენტო არჩევნებისთვის; ფრაქციის შექმნის უფლება განისაზღვრება უკვე 4 დეპუტატისთვის, ნაცვლად 7 დეპუტატისა; რაც შეეხება გენერალური პროკურორის არჩევის წესს, აქაც არის შეთანხმებული კონკრეტული ტექსტი, რომელიც ეფუძნება მიშელის დოკუმენტს. ანუ, სამივე საკითხთან დაკავშირებით გვაქვს სრული კონსენსუსი შესაბამის პარტიებთან და საერთო თანხმობის საფუძველზე ხელმოწერებით დაინიცირდება ეს კანონპროექტი", — განაცხადა ირაკლი კობახიძემ.

შემდგომი ეტაპი კონკრეტულ დოკუმენტზე შეჯერება და კანონპროექტის დაინიცირებაა. სტრატეგია აღმაშენებლის ლიდერი, გიორგი ვაშაძე ამბობს ქართული ოცნების დეპუტატების ნაწილს სურდა ცვლილებები შემდეგი წლისთვის გადაეტანა, თუმცა საბოლოოდ შეთანხმდნენ, რომ იგი ოქტომბერში უნდა დამტკიცდეს.

"ჩვენ შევჯერდით საკონსტიტუციო ცვლილებებზე, რომელიც არის ერთ-ერთი ყველაზე მნიშვნელოვანი ცვლილება [...] ჩვენ მოვაწერთ ხელს ამ ინიციატივას, რადგან ინიციატივას სჭირდება ოპოზიციის მხარდაჭერაც იმისათვის, რომ საბოლოო ჯამში მივიდეს. იმედი მაქვს, რომ ქართული ოცნება თავის პირობას შეასრულებს და კიდევ არ მოგვიწევს ჭიდაობა, როგორც გვიწევს ხოლმე.

ზოგიერთი საუბრობდა რატომღაც მომავალ წელში გადატანაზე ქართული ოცნებიდან, ეს სპეკულაციები რომ არ ყოფილიყო, ყველაზე გვიან ოქტომბერში უნდა იყოს საკონსტიტუციო ცვლილებები", — განაცხადა გიორგი ვაშაძემ.

აღნიშნული ცვლილებები ევროპული საბჭოს პრეზიდენტის, შარლ მიშელის ეგიდით შექმნილი დოკუმენტის შემადგენელი ნაწილია.

გაიგე მეტი: