საქართველოს პრემიერმინისტრის, ირაკლი ღარიბაშვილის განცხადებით, მეჩეთების დაკანონება აქვთ დაგეგმილი. მისივე თქმით, ის მუსლიმ თემთან მეგობრობს. ამის შესახებ მთავრობის მეთაურმა პარლამენტში წლიური ანგარიშის წარდგენის შემდეგ დასმული კითხვების პასუხად განაცხადა.

"გვაქვს, ასევე, დაგეგმილი მეჩეთების დაკანონება, რომლებიც წლებია ჩამოკიდებული იყო ჰაერში და რატომღაც არ უკანონდებოდათ", — განაცხადა ღარიბაშვილმა.

დეპუტატმა ტარიელ ნაკაიძემ მას ჰკითხა, რელიგიის საკითხთა სახელმწიფო სააგენტოს გაუქმებას ხომ არ ფიქრობს, რაზეც ღარიბაშვილმა უპასუხა:

"არ ვიცი რატომ ეწინააღმდეგებით მას, რომელიც ძალიან ნაყოფიერად მუშაობს ჩემი შეფასებით. ჩემ დროს შეიქმნა რელიგიის სააგენტო. ჩვენ მაშინ საბჭოთა კავშირის დროს დაზარალებულ რელიგიებს, ძირითად რელიგიურ კონფესიებს დავუნიშნეთ დაფინანსება, რომლებიც საერთოდ მივიწყებულები იყვნენ. თქვენ იცით, რა მდგომარეობაში იმყოფებოდნენ წინა ხელისუფლების დროს რელიგიის მსახურები, არანაირი ყურადღება არ ექცეოდათ მათ და სწორედ ჩვენი მთავრობის დროს გამოიყო დაფინანსება და კიდევ ვაპირებთ, რომ გავუზარდოთ დაფინანსება წელსაც და გაისად კიდევ უფრო მეტი. მათ შორის, გვინდა გამოვუყოთ რეზიდენცია და ასე შემდეგ", — აღნიშნა პრემიერმინისტრმა.

ნაკაიძემ ღარიბაშვილს ქვეყანაში ეთნიკური უმცირესობების წინაშე არსებულ პრობლემებზე ჰკითხა. ნაკაიძის თქმით, 1+4 პროგრამის შემდეგ სახელმწიფოს ახალი მიდგომები ინტეგრაციის პოლიტიკაში, რომელიც დღეს არსებულ რეალობას შეცვლის, არ აქვს. მან ღარიბაშვილს, აგრეთვე, ჰკითხა ამ მიმართულებით რა აქვთ დაგეგმილი. ნაკაიძე, ასევე, დაინტერესდა, პრემიერმინისტრს როდის ექნება პოლიტიკური ნება, რომ ბათუმში ახალი მეჩეთის აშენებაზე თანხმობა გასცეს, რაზეც მას პასუხი არ გაუცია.