დეპუტატმა ტარიელ ნაკაიძემ პრემიერმინისტრ ირაკლი ღარიბაშვილს პარლამენტში წლიური ანგარიშის წარდგენის შემდეგ ქვეყანაში ეთნიკური უმცირესობების წინაშე არსებულ პრობლემებზე ჰკითხა. ნაკაიძის თქმით, 1+4 პროგრამის შემდეგ სახელმწიფოს ახალი მიდგომები ინტეგრაციის პოლიტიკაში, რომელიც დღეს არსებულ რეალობას შეცვლის, არ აქვს. მან ღარიბაშვილს ჰკითხა ამ მიმართულებით რა აქვთ დაგეგმილი. ნაკაიძე, ასევე, დაინტერესდა, პრემიერმინისტრს როდის ექნება პოლიტიკური ნება, რომ ბათუმში ახალი მეჩეთის აშენებაზე თანხმობა გასცეს.

"თუ იცით რომ საქართველოში ცხოვრობენ უმცირესობები, რომლებიც მოსახლეობის, დაახლოებით, 1/4-ს შეადგენენ, დაახლოებით, 20%-ია ეს მოსახლეობა. თქვენს ანგარიშში, სამწუხაროდ, ძალიან მცირედ, თითქოს ამბობდით, რომ რაღაც ენის შესწავლისთვის მზად ხართ და რაღაც პროგრამები უნდა განახორციელოთ", — აღნიშნა ნაკაიძემ.

მან, ასევე, მთავრობის მეთაურს ჰკითხა, რელიგიის საკითხთა სახელმწიფო სააგენტოს გაუქმებას ხომ არ ფიქრობს.

"საერთოდ, როდის უნდა დასრულდეს და რა ქმედებები შეგიძლიათ განახორციელოთ რელიგიურ უმცირესობებზე სიძულვილით ჩადენილი საქმეების გამოსაძიებლად. ჩვენ ვიცით ბუკნარის, ასევე, მარნეულისა და დმანისის მოვლენები, სადაც ყველგან იყო კანონდარღევა და სიძულვილის ენა. როდემდე უნდა ვესაუბროთ სუს-ის ენით საქართველოს ეთნიკურ უმცირესობებს. ხომ არ ფიქრობთ, რომ რელიგიის საკითხთა სახელმწიფო სააგენტოს, რომელსაც წელიწადში 5 მილიონ ლარს ვუხდით, გაუქმებაა საჭირო და როდის შეძლებთ გასცეთ პოლიტიკური ნება, რომ ბათუმში ახალი მეჩეთი აშენდეს...", — განაცხადა ტარიელ ნაკაიძემ.

ბათუმში, სალოცავი სივრცის არასაკმარისობის გამო, მუსლიმი მრევლი წლებია მეორე მეჩეთის აშენებას ითხოვს. საკმარისი სივრცის არარსებობის გამო, მათი დიდი ნაწილი რელიგიის თავისუფლებით სარგებლობას ვერ ახერხებს.