="გუშინწინ გვარამიას სიზმრები ვიხილეთ, გუშინ — კეზერაშვილის", — ასე ეხმაურება ქართული ოცნების თავმჯდომარე, ირაკლი კობახიძე IPSOS-ისა და Edison Research-ის კვლევის შედეგებს, რომელიც ტელეკომპანია მთავარი არხისა და ფორმულას დაკვეთით ჩატარდა.

"და ამ სიზმრის ახსნა არის ძალიან მარტივი. მათ სურთ და ოცნებობენ იმაზე, რომ შედგეს ნაც. მოძრაობისა და გახარიას კოალიცია. ძალიან მარტივად იშიფრება მათი სიზმრები რეალურად იმ მონაცემებით, რომელიც გამოაქვეყნეს. რა თქმა უნდა, ეს არის სიზმრები, ჩვენ როგორც მიჩვეულნი ვართ წინა არჩევნებიდან, რომ ვერასდროს "ვერ ახერხებდნენ" ისინი შედეგების გამოცნობას. რა თქმა უნდა, ეს კვლევები არის პოლიტიკური ინტერესებით ნაკარნახევი", — განაცხადა კობახიძემ.

ტელეკომპანია ფორმულას დაკვეთით ჩატარებული Edison Research-ის კვლევის შედეგების მიხედვით, კითხვაზე: "დღეს რომ თვითმმართველობის არჩევნები იყოს რომელ პარტიას მისცემდით ხმას" ალოკაციის გარეშე ხმები შემდეგნაირად ნაწილდება: 25% ამბობს, რომ ქართულ ოცნებას მისცემდა ხმას, 19% — ენმ-გაერთიანებულ ოპოზიციას, ხოლო 10% გიორგი გახარიას პარტიას, საქართველოსთვის.

მთავარი არხის ეგზიტპოლის მიხედვით, რეგიონების ნაწილში მოსალოდნელია მეორე ტური მმართველი გუნდისა და ენმ-ს კანდიდატებს შორის, ნაწილში კი ერთ კანდიდატს ხმების 50%-ზე მეტი ექნება.