რუსთავი 2-ის გენერალურმა დირექტორმა ნიკა გვარამიამ ბრიფინგი გამართა, სადაც მან ქიბარ ხალვაშს მოუწოდა, მიყიდოს არხი რუსთავი 2-ის თანამშრომლებს და ისინი მის საფასურს გადაიხდიან.

მან მადლობა გადაუხადა რუსთავი 2-ს და მის კოლექტივს და განაცხადა, რომ არხის თანამშრომლები ქმნიან რუსთავი 2-ს ისეთად, როგორიც ისაა და არა თავად გენერალური დირექტორი. გვარამიას თქმით, ის უბრალოდ დაქირავებული მენეჯერია:

"მოგიწოდებთ გადასცეთ არხი ამ ადამიანებს. ქიბარ ხალვაში სასამართლოში 7 მილიონზე ოდნავ მეტ ლარზე დაობდა. ჩვენ დავთვალეთ, ესაა 4 209 397 დოლარი, იმ კურსით, რომელიც მაშინ იყო. მას მიღებული აქვს გარკვეული რაოდენობა და დარჩენილ 3 944 397 დოლარს გადავიხდით ჩვენ. ხო უნდა მას ტელეკომპანიის გაყიდვა და ტელეკომპანიის სარედაქიო დამოუკიდებლობის შენარჩუნება, ჩვენ მივმართავთ ქიბარ ხალვაშს და მის პატრონს, საქართველოს მთავრობას, აი ამ ადამიანებს გადაეცით 100 პროცენტი რუსთავი ორის და ჩვენ თქვენს კომერციულ ინტერესებს დავაკმაყოფილებთ, პატივცემულო ქიბარ".

უზენაესმა სასამართლომ რუსთავი 2 ქიბარ ხალვაშს მიაკუთვნა.