დღეს, 23 ივნისს გამართულ სხდომაზე საქართველოს ეროვნული ბანკის მონეტარული პოლიტიკის კომიტეტმა რეფინანსირების განაკვეთის უცვლელად, 9,5%-ზე დატოვების გადაწყვეტილება მიიღო.

რეფინანსირების განაკვეთი

რეფინანსირების განაკვეთი ეროვნული ბანკის ხელთ არსებული ინსტრუმენტია, რომლის საშუალებითაც ის ფასების სტაბილურობას უზრუნველყოფს. როდესაც რეფინანსირების განაკვეთი იზრდება, ამას მონეტარული პოლიტიკის გამკაცრებას უწოდებენ და ამ დროს მსესხებლებს აღნიშნულ განაკვეთზე მიბმული კრედიტები უძვირდებათ. შესაბამისად, ადამიანები ამცირებენ ხარჯვას, რის გამოც მცირდება საერთო მოთხოვნა — ეს კი ფასების ზრდას უშლის ხელს.

მიმდინარე წლის აპრილის მიწურულს რეფინანსირების განაკვეთი 1 პროცენტული პუნქტით, 9,5%-მდე გაიზარდა და 125 ათასამდე მსესხებელს კრედიტი გაუძვირდა — ეს 2008 წლის შემდეგ განაკვეთის მაქსიმალური მაჩვენებელია. დღევანდელ სხდომაზე რეფინანსირების განაკვეთის უცვლელად დატოვება ინფლაციური რისკების წინააღმდეგ გამკაცრებული პოლიტიკის გაგრძელებად შეიძლება ჩაითვალოს — ეს ნიშნავს იმას, რომ ეროვნული ბანკი კვლავ ხედავს ინფლაციის რისკებს, რის გამოც რეფინანსირების განაკვეთს კვლავ მაღალ, 9,5%-იან ნიშნულზე ტოვებს.

ინფლაცია

მაისში წლიური ინფლაცია 7,7% იყო — ეს ბოლო 10 წელში ფასების ზრდის რეკორდული მაჩვენებელია. აპრილში ფასები წლიურად 7,2%-ით გაიზარდა. მაღალი ინფლაცია იყო მარტშიც, როდესაც ფასების ასევე 7,2%-იანი ზრდა დაფიქსირდა. უნდა აღინიშნოს, რომ ეროვნული ბანკის მიერ დადგენილი ინფლაციის მიზნობრივი მაჩვენებელი, ანუ ფასების ზრდის დასაშვები დონე 3%-ია.

ეროვნული ბანკის მიერ გავრცელებულ განცხადებაში ნათქვამია, რომ გლობალურად მზარდი ნავთობის ფასები საწვავის გაძვირებასა და, შედეგად, ინფლაციაში მისი წვლილის მატებას განაპირობებს. გარდა ამისა, სებ-ის პროგნოზით, თბილისში გაზის ტარიფის ზრდის ფონზე ივნისიდან კომუნალური გადასახადების გავლენა ინფლაციაზე კიდევ უფრო გაიზრდება. ეროვნული ბანკი ელოდება, რომ ივნისში წლიური ინფლაციის მაჩვენებელი პიკს მიაღწევს, 2021 წელს, სხვა თანაბარ პირობებში, საშუალოდ 7% იქნება, ხოლო მიზნობრივ მაჩვენებელს 2022 წელს ეტაპობრივად დაუბრუნდება.

ცნობისთვის, მონეტარული პოლიტიკის კომიტეტის შემდეგი სხდომა 2021 წლის 4 აგვისტოს ჩატარდება.