ოკუპანტების მიერ გატაცებული ზაზა გახელაძის ოჯახის წევრებმა, ახლობლებმა და მხარდამჭერებმა მისი გათავისუფლების მოთხოვნით სოფელ ქვემოჭალაში აქცია-მსვლელობა გამართეს. აქციას თბილისიდან შეუერთდნენ აქტივისტები და ოპოზიციის ნაწილი.

დღეს გახელაძის დაბადების დღეა, აქცია სწორედ ამასთან დაკავშირებით დაიგეგმა. ოჯახის წევრებმა კიდევ ერთხელ მოითხოვეს, ხელისუფლებამ ყველა ღონე იხმაროს ზაზას გასათავისუფლებლად, რადგან ის თითქმის 1 წელია, უკანონო პატიმრობაშია.

მსვლელობის მონაწილეებს ხელში ჰქონდათ ბანერი წარწერით "თავისუფლება ზაზა გახელაძეს", რომელსაც სიმბოლურად მავთულხლართი ჰქონდა შემოვლებული.

ისინი სამთავისის მონასტერში მივიდნენ, სადაც სანთლები დაანთეს. თავდაპირველად გზის გადაკეტვა იყო დაგეგმილი, თუმცა ოჯახის წევრებმა განაცხადეს, რომ გადაიფიქრეს.

გარდა ამისა, გახელაძის მამას დაგეგმილი ჰქონდა გადასვლა საოკუპაციო ხაზის მეორე მხარეს. მისი თქმით, შვილის დასახმარებლად სხვა გამოსავალს ვეღარ ხედავდა. თუმცა, დღეს განაცხადა, რომ გადაიფიქრა ოჯახისა და პატრიარქის თხოვნით. გახელაძის ოჯახის წევრების თქმით, საპატრიარქო მათ დახმარებას დაჰპირდა.

რაც შეეხება სამომავლო გეგმებს, ზაზა გახელაძის ცოლის, ირმა ბუთხუზის განცხადებით, გადაწყვეტილებებს ეტაპობრივად მიიღებენ. მისივე თქმით, ამ ეტაპზე ელოდებიან საპატრიარქოს, მოახერხებენ თუ არა ისინი გათავისუფლებაში დახმარებას. ბუთხუზმა აღნიშნა, რომ ეს დრო ხელისუფლებამაც უნდა გამოიყენოს და ყველაფერი გააკეთოს ზაზას გასათავისუფლებლად.

ნახეთ On.ge-ს პირდაპირ ეთერი მსვლელობიდან:

11 ივლისს ერთი წელი გავა მას შემდეგ, რაც ზაზა გახელაძე ოუპანტებმა გაიტაცეს. ის კასპში ჯერ ცეცხლსასროლი იარაღით დაჭრეს, შემდეგ კი დააკავეს.

გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

ოკუპირებული ცხინვალის ე.წ. სასამართლომ მას 5 თებერვალს 12 წლითა და 6 თვით უკანონო პატიმრობა მიუსაჯა.