შინაგან საქმეთა სამინისტროს განცხადებით, გუმათჰესთან განთავსებულ რკინის ბარიკადებს აიღებენ. ამასთან, უწყებაში ამბობენ, რომ პოლიციის თანამშომლები გუმათჰესთან და რიონის ხეობაში, უსაფრთხოების ზომებიდან გამომდინარე, კვლავ დარჩებიან.

"შინაგან საქმეთა სამინისტრო, როგორც მართლწესრიგის დაცვაზე პასუხისმგებელი უწყება, მოუწოდებს ნამახვანჰესის მშენებლობის მოწინააღმდეგე მოქალაქეებს, შეკრებისა და გამოხატვის დროს დაიცვან კანონის მოთხოვნები და დაემორჩილონ პოლიციელთა კანონიერ მოთხოვნებს. სამართალდარღვევის ნებისმიერი ფაქტის გამოვლენის შემთხვევაში, პოლიცია იმოქმედებს კანონმდებლობის შესაბამისად და თითოეულ ასეთ ფაქტზე თანმიმდევრულ რეაგირებას მოახდენს", — აღნიშნულია განცხადებაში.

რიონის ხეობის აქტივისტები გუმათჰესთან რკინის ჯებირების აღებასა და გზის გახსნას უკვე რამდენიმე თვეა ითხოვენ. აღნიშნული მოთხოვნა მათ ნამახვანჰესის საკითხზე ევროკავშირის წარმომადგენლობით გამართულ პირველ შეხვედრაზეც დააყენეს.

როგორც აქტივისტი, ვარლამ გოლეთიანი ამბობს, პირველადი მოთხოვნების დაკმაყოფილების შემდეგ, ახალი შეხვედრა ჩაინიშნება. მისივე თქმით, ახლა ისინი პროტესტის დაკავებული მონაწილეების გათავისუფლებას ელოდებიან.

რიონის ხეობიდან გავრცელებულ ვიდეოებში ჩანს, რომ ბარიკადების დემონტაჟი უკვე მიმდინარეობს.

ამავე თემაზე: