აშშ-ს პრეზიდენტის, ჯო ბაიდენის განცხადებით, არსებობს რეალური პერსპექტივა, რომ რუსეთსა და ამერიკას შორის ურთიერთობები გააუმჯობესონ. ამის შესახებ მან ჟენევაში სამიტის დასრულების შემდეგ გამართულ კონფერენციაზე ისაუბრა.

"ეს იქნება ტესტი. არ ვამბობ, რომ რახან მე და პრეზიდენტი პუტინი დავსხედით და რაღაცების გაკეთებაზე შევთანხმდით, მოულოდნელად ყველაფერი იმუშავებს. ამას არ ვამბობ. რასაც ვამბობ, ისაა, რომ ვფიქრობ — არსებობს რეალური პერსპექტივა, რომ ჩვენს ორ ქვეყანას შორის ურთიერთობები მნიშვნელოვნად გავაუმჯობესოთ, ჩვენს პრინციპებსა და ღირებულებებზე უარის თქმის გარეშე", — თქვა მან.

დღეს ჟენევაში აშშ-სა და რუსეთის პრეზიდენტების სამიტი მიმდინარეობდა. შეხვედრა რამდენიმე საათს გაგრძელდა. ორივე მათგანს ვილა ლა გრანჟში შვეიცარიის პრეზიდენტი, გაი პარმელენი შეხვდა.